പ്രതിയുടെ ആദ്യത്തെ കൊലപാതകമല്ല!!! തിരുവനന്തപുരത്ത് ഹോട്ടൽ റിസപ്ഷനിസ്റ്റിനെ പട്ടാപ്പകൽ വെട്ടിക്കൊന്ന പ്രതി കൊടുംകുറ്റവാളി; നിർണ്ണായക കണ്ടെത്തൽ പുറത്ത്

തിരുവനന്തപുരം: തിരുവനന്തപുരത്ത് ഹോട്ടൽ റിസപ്ഷനിസ്റ്റിനെ പട്ടാപ്പകൽ വെട്ടിക്കൊന്ന സംഭവത്തിൽ (Thampanoor Murder) പ്രതിയായ അജേഷിക്കുറിച്ചുള്ള കൂടുതൽ വിവരങ്ങൾ പുറത്ത്. പ്രതിയുടെ ആദ്യത്തെ കൊലക്കേസല്ല ഇതെന്നാണ് പോലീസ് കണ്ടെത്തൽ. കൊലപാതക സമയത്ത് ഇയാൾ ലഹരിയിലായിരുന്നു. ആറ്റിങ്ങലിൽ പെൺകുട്ടിയെ കൊലപ്പെടുത്തിയ കേസിൽ പ്രതിയാണ് ഇയാളെന്നും പോലീസ് അറിയിച്ചു. ഗുണ്ടാ ലിസ്റ്റിൽ ഉള്ള ഇയാൾക്കെതിരെ എട്ടോളം കേസുകളും നിലവിലുണ്ട്. സ്വദേശമായ കല്ലിയോട് നിന്നാണ് ഷാഡോ പോലീസ് ഇയാളെ പിടികൂടിയത്.

അതേസമയം തമ്പാനൂരിലെ ഹോട്ടലിൽ ജീവനക്കാരന്റെ കൊലപാതകത്തിലേക്ക് നയിച്ചത് മൂന്ന് മാസം മുൻപ് നടന്ന വാക്കുതർക്കമെന്ന് പോലീസ് പറഞ്ഞു. ഹോട്ടൽ റിസപ്ഷനിസ്റ്റായ നാഗർകോവിൽ സ്വദേശി അയ്യപ്പനായിരുന്നു പട്ടാപ്പകൽ കൊല്ലപ്പെട്ടത്. സംഭവത്തിൽ നെടുമങ്ങാട് സ്വദേശി അജീഷിനെ (36) പോലീസ് പിടികൂടിയിരുന്നു. പിന്നീട് നടത്തിയ അന്വേഷണത്തിലാണ് പ്രതിക്കുറിച്ചുള്ള ഞെട്ടിപ്പിക്കുന്ന വിവരങ്ങൾ പുറത്തുവന്നത്. മൂന്ന് മാസം മുൻപ് അയ്യപ്പനും അജീഷും തമ്മിൽ വാക്കുതർക്കം ഉണ്ടായിരുന്നു. ഇതിന്റെ വൈരാഗ്യമാണ് കൊലപാതകത്തിലേക്ക് നയിച്ചതെന്നാണ് വിവരം.

വെള്ളിയാഴ്ച രാവിലെ ബൈക്കിൽ ആയുധവുമായി എത്തിയ അജീഷ് ഹോട്ടലിലേക്ക് കയറി വെട്ടിക്കൊലപ്പെടുത്തുകയാണ് ചെയ്തത്. ഹോട്ടലിലേക്ക് ആയുധവുമായെത്തി അയ്യപ്പെനെ വെട്ടുന്നത് സിസിടിവി ദൃശ്യങ്ങളിൽ വ്യക്തമായിരുന്നു. ഹോട്ടൽ ഉടമയുടെ ബന്ധുവാണ് കൊല്ലപ്പെട്ട അയ്യപ്പൻ. സംഭവത്തിൽ കേസന്വേഷണം തുടരുകയാണ്.