‘വായു ശക്തി ‘ അഭ്യാസപ്രകടനം മാർച്ച് 7 ന്; ഇന്ത്യയുടെ റഫേലടക്കം 150 ജെറ്റുകൾ പാക് അതിർത്തിയിൽ പാറിപ്പറക്കും

ദില്ലി: ഇന്ത്യയുടെ റഫേലടക്കം 150 ജെറ്റുകൾ പാക് അതിർത്തിയിൽ മാർച്ച് 7 ന് പാറിപ്പറക്കും(IAF aircraft to demonstrate capabilities at exercise Vayu Shakti, Rafale to participate 1st time). വായു ശക്തി (Vayu Shakti) എന്ന് പേരിട്ടിരിക്കുന്ന പ്രകടനത്തിന്റെ പ്രദർശന ഭാഗമായാണ് അഭ്യാസപ്രകടനം നടത്തുന്നത്. മാർച്ച് ഏഴിനാണ് പ്രകടനം അരങ്ങേറുക. ഇന്ത്യൻ ആണവ പരീക്ഷണങ്ങളുടെ കേന്ദ്രമായ പൊഖ്‌റാൻ മേഖലയിലാണ് വ്യോമസേന ആകാശത്തെ പ്രകമ്പനം കൊള്ളിക്കുക.

ഇന്ത്യ-പാകിസ്ഥാൻ അതിർത്തി മേഖലയിലാണ് വ്യോമാഭ്യാസമെന്നതും ഏറെ ശ്രദ്ധേയമാണ്. പ്രധാനമന്ത്രി നരേന്ദ്രമോദിയാണ് മുഖ്യാതിഥിയായി പ്രതിരോധ മന്ത്രി രാജ്‌നാഥ് സിംഗിനൊപ്പം പരിപാടിയിൽ പങ്കെടുക്കുക. വായുശക്തി പ്രദർശനത്തിൽ റഫേലടക്കം 150 വിമാനങ്ങളാണ് അണിചേരുക. ഇതിൽ ഫൈറ്റർ ജെറ്റുകളും ഹെലികോപ്റ്ററുകളും അണിനിരക്കും. ഇന്ത്യയുടെ തദ്ദേശീയ ജെറ്റുകളായ തേജസും റഫേലുകൾക്കൊപ്പമുണ്ടാകും. യുദ്ധമേഖല കളിൽ നടത്തേണ്ട എല്ലാത്തരം പ്രദർശനങ്ങളും നടത്തുമെന്നാണ് വ്യോമസേന അറിയിക്കുന്നത്.

2019ന് ശേഷം രണ്ടു വർഷത്തെ ഇടവേളയ്‌ക്ക് ശേഷമാണ് സമ്പൂർണ്ണ ശക്തിപ്രകടനത്തിന് വ്യോമസേന തയ്യാറെടുക്കുന്നത്. ഏഷ്യയുടെ കിഴക്കൻ മേഖല കനത്ത യുദ്ധ സാഹചര്യത്തിലേക്ക് വലിച്ചിഴക്കപ്പെട്ടിരിക്കേ ഇന്ത്യയുടെ വ്യോമസേനയുടെ തയ്യാറെടുപ്പ് സവിശേഷ ശ്രദ്ധനേടുകയാണ്.
മൂന്ന് വർഷത്തിലൊരിക്കൽ നടക്കുന്ന പ്രദർശനത്തിൽ റഫേലിനൊപ്പം ജാഗ്വർ, സുഖോയ്-30, മിഗ്-29, തേജസ്, മിഗ്-21 ബൈസൺ, ഹ്വാക്32, എം200 എന്നിവയാണ് ഉൾക്കൊള്ളിച്ചിരിക്കുന്നത്.