മുംബൈ: ആക്രമിയുടെ കുത്തേറ്റ് മുംബൈ ആശുപത്രിയില് ചികിത്സയില് കഴിയുന്ന ബോളിവുഡ് താരം സെയ്ഫ് അലി ഖാന്റെ ആരോഗ്യ നിലയില് പുരോഗതിയുണ്ടെന്ന് റിപ്പോര്ട്ട്. രണ്ട് ദിവസത്തിനുള്ളില് തന്നെ സെയ്ഫ് ആശുപത്രി വിട്ടേക്കുമെന്നാണ് വിവരംഅതേസമയം . മക്കളായ തൈമൂറും ജേയും അമ്മ കരീനയ്ക്കൊപ്പം ഇന്ന് സെയ്ഫിനെ കാണാന് ആശുപത്രിയിലെത്തി.
സെയ്ഫിന്റെ സഹോദരി സോഹ അലി ഖാനും ഭര്ത്താവ് കുണാല് ഖെമുവും ഇന്ന് താരത്തെ സന്ദര്ശിക്കാന് ആശുപത്രിയില് എത്തിയിരുന്നു. സെയ്ഫിന്റെ ആദ്യഭാര്യയിലെ മക്കളായ സാറയും ഇബ്രാഹിമും എല്ലാദിവസവും താരത്തെ കാണാന് എത്തിയിരുന്നു.
വ്യാഴാഴ്ച പുലര്ച്ചെയാണ് വീട്ടില് അതിക്രമിച്ചു കടന്നയാള് സെയ്ഫിനെ ആക്രമിച്ച് ഗുരുതര പരിക്കേല്പിച്ചത്. നടന്റെ മുംബൈയിലെ ബാന്ദ്രാ വെസ്റ്റിലെ വസതിയിലായിരുന്നു സംഭവം. ആറ് കുത്തേറ്റ സെയ്ഫ് നിലവില് മുംബൈയിലെ ലീലാവതി ആശുപത്രിയിലാണ് ചികിത്സയില് കഴിയുന്നത്. പ്രതി മുഹമ്മദ് ഷരീഫുള് ഇസ്ലാം പിടിയിലായിട്ടുണ്ട്. ബംഗ്ലാദേശി പൗരനായ ഇയാള്, അനധികൃതമായാണ് ഇന്ത്യയിലേക്ക് കടന്നത്. ബിജോയ് ദാസ് എന്ന കള്ളപ്പേരില് ആയിരുന്നു ഇയാള് കഴിഞ്ഞിരുന്നത്.
