വരുന്ന അഞ്ച് വർഷത്തിനുള്ളിൽ അമേരിക്കയിലെ ഗ്രേറ്റ് സാൾട്ട് ലേക് ഓർമ്മയാകും ; ആരോഗ്യപ്രശ്നങ്ങളടക്കം ഉണ്ടാകുമെന്ന് മുന്നറിയിപ്പ്

അമേരിക്കയിലെ യൂട്ടാ മേഖലയിലുള്ള ഗ്രേറ്റ് സാൾട്ട് ലേക് അടുത്ത അഞ്ച് വർഷത്തിനുള്ളിൽ അപ്രത്യക്ഷമാകുമെന്ന് ഗവേഷകരുടെ പ്രവചനം. 16 മീറ്റർ മാത്രം ശരാശരി താഴ്ചയുള്ള ഈ തടാകത്തിലേക്ക് വർഷത്തിൽ ഏതാണ്ട് പന്ത്രണ്ട് ലക്ഷം ലിറ്റർ വെള്ളം ഒഴുകിയെത്തിയാലെ ഈ അപ്രത്യക്ഷമാകൽ തടയാനാകൂ എന്നാണ് ഗവേഷകർ പറയുന്നത്. എന്നാൽ നിലവിൽ ഒരു ലക്ഷം ലിറ്റർ വെള്ളം മാത്രമാണ് ഈ തടാകത്തിൽ ഒഴുകിയെത്തുന്നത്.

ബ്രിഗാം യങ് സർവകലാശലയിലെ ഗവേഷകരമാണ് തങ്ങളുടെ പഠന റിപ്പോർട്ട് ഇപ്പോൾ പുറത്ത് വിട്ടിരിക്കുന്നത്. തടാകത്തിനെ സജീവമായി നിലനിർത്താൻ മേഖലയിലെ ജലത്തിന്റെ ഉപയോഗത്തിൽ കുറവ് വരുത്തണം. ഇപ്പോഴത്തെ സാഹചര്യത്തിൽ ജലവിനിയോഗം പകുതിയായി തന്നെ കുറച്ചാലെ തടാകത്തെ നിലനിർത്താനാകൂ. ഇതിനോടനുബന്ധിച്ച് നിരവധി നിയമ നിർമാണങ്ങളും, സാമൂഹിക അവബോധ നടപടികളും യൂട്ടാ മേഖലയിൽ നടന്നിരുന്നു. എങ്കിലും അവയൊന്നും ഇതുവരെയും വേണ്ടത്ര രീതിയിൽ വിജയിച്ചിട്ടില്ല.

ഈ തടാകം വറ്റുന്നത് പ്രദേശത്ത് പാരിസ്ഥിതികമായും ആരോഗ്യകരമായും സാമ്പത്തികമായുമുള്ള പ്രത്യാഘാതങ്ങൾ ഉണ്ടാക്കും എന്നാണു വിലയിരുത്തപ്പെടുന്നത്. തടാകത്തിന്റെ അപ്രത്യക്ഷമാകൽ വലിയ തോതിലുള്ള വായു-ജല മലിനീകരണം സൃഷ്ടിക്കും. വംശനാശ ഭീഷണിയുള്ളള പല ജീവികളുടെയും വംശനാശത്തിനും മേഖലയിലെ കൃഷി, വ്യവസായം തുടങ്ങിയവയുടെ തകർച്ചയ്ക്കും, മേഖലയുടെ ജീവിത നിലവാരം തന്നെ മോശമാകുന്നതിനും കാരണമാകും.

തടാകം എന്നത് ജൈവവൈവിധ്യത്തെ മാത്രം ബാധിക്കുന്നതല്ലെന്നും മേഖലയിലെ മലിനീകരണത്തിൽ പോലും വലിയ വർധനവുണ്ടാക്കാനും തടാകത്തിന്റെ ജലനിരപ്പ് കുറയുന്നത് കാരണമാകുമെന്നും റിപ്പോർട്ടിൽ സൂചിപ്പിക്കുന്നു. കൂടാതെ പ്രദേശത്തെ താപനില നിയന്ത്രിക്കുന്നതിലും, സമീപ മേഖലകളിലെ പർവതത്തിലെ മഞ്ഞിന്റെ അളവിനെ സ്വാധീനിക്കുന്നതിലും ഈ തടാകത്തിന് പങ്കുണ്ടെന്നും ഗവേഷകർ പറയുന്നു.

തടാകം വറ്റി വരണ്ടാൽ വീശിയടിക്കുന്ന കാറ്റത്ത് വലിയ തോതിൽ പൊടി ഉയരും. ഈ പൊടിപടലങ്ങളിൽ തടാകത്തിന്റെ അടിത്തട്ടിലുണ്ടായിരുന്ന മെർക്കുറി, ലെഡ്, ആർസനിക് തുടങ്ങിയ വായുമലിനീകരണ സാധ്യതയും രോഗകാരികളുമായ ചെറു പദാർത്ഥങ്ങളും ഉണ്ടാകും എന്നത് ഗുരുതരമായ ആരോഗ്യപ്രശ്നങ്ങളുണ്ടാക്കും എന്നത് ഉറപ്പാണ്.

കലിഫോർണിയയിൽ സമാനമായ രീതിയിൽ തടാകം വറ്റി വരണ്ടതോടെ മേഖലയിലുള്ളളവർക്ക് ശ്വാസകോശ സംബന്ധമായ രോഗങ്ങളും ഹൃദ്രോഗബാധയും റിപ്പോർട്ട് ചെയ്യപ്പെട്ടിരുന്നു. അതേസമയം യൂട്ടാ

എന്നാൽ മേഖലയിലുള്ള സാധാരണക്കാർക്ക് തോട്ടത്തിലും മറ്റും ഉപയോഗിക്കുന്ന വെള്ളം കുറയ്ക്കുക എന്നതിനപ്പുറം തടാകത്തിന്റെ സംരക്ഷണത്തിനായി വെള്ളത്തിന്റെ ഉപയോഗം കുറയ്ക്കുന്നതിന് കാര്യമായി ഒന്നും ചെയ്യാനില്ല. മേഖലയിലെ ഭൂഗർഭജലത്തിലെ വലിയ പങ്കും തടാകത്തിലെ വലിയ അളവ് ജലവും വഴിതിരിച്ച് വിട്ട് ഉപയോഗിക്കുന്നത് വ്യാവസായിക അടിസ്ഥാനത്തിലുള്ള കാർഷിക ഇടങ്ങളിലാണ്.
ഇരുപത്തി മൂന്ന് മില്യൺ ഏക്കർ പ്രദേശത്തെ കൃഷിയിടങ്ങളിൽ കൃഷി ആവശ്യങ്ങൾക്കായി വെള്ളം എത്തിക്കുന്നത് ഈ തടാകത്തിലേക്കെത്തേണ്ട വെള്ളം വഴിതിരിച്ചു വിട്ടാണ്. യൂട്ടായിലെ മാത്രമല്ല സമീപത്തുള്ള മറ്റ് സംസ്ഥാനങ്ങളിലെ കൂടി കർഷകർ ജല ഉപയോഗം കുറച്ചാൽ മാത്രമെ തടാകത്തിലേക്കെത്തുന്ന വെള്ളത്തിന്റെ അളവ് വർധിപ്പിക്കാൻ സാധിക്കൂ.