ഫിലിപ്പീൻസിൽ ഇന്ത്യക്കാരായ ദമ്പതികളെ അജ്ഞാതൻ വീടതിക്രമിച്ചു കയറി വെടിവെച്ച് കൊന്നു

മനില : ഇന്ത്യക്കാരായ ദമ്പതികളെ ഫിലിപ്പീന്‍സില്‍ അജ്ഞാതൻ വെടിവച്ച് കൊന്നു. പഞ്ചാബിലെ ജലന്ധര്‍ സ്വദേശികളായ സുഖ് വീന്ദര്‍ സിങ്(41) ഭാര്യ കിരണ്‍ദീപ് കൗര്‍(33) എന്നിവരാണ് സംഭവത്തിൽ കൊല്ലപ്പെട്ടത്. ഫിലിപ്പീൻസ് തലസ്ഥാനമായ മനിലയിലെ ദമ്പതികളുടെ വീട്ടില്‍ ഇക്കഴിഞ്ഞ ശനിയാഴ്ച രാത്രിയായിരുന്നു കൊലപാതകം നടന്നത്.

സുഖ് വീന്ദര്‍ സിങ് കഴിഞ്ഞ 19 വര്‍ഷമായി മനിലയിലാണ് താമസിച്ചിരുന്നത്. ഭാര്യ അടുത്തിടെയാണ് സുഖ് വീന്ദറിനോടൊപ്പം ഇവിടെയെത്തിയത്. ശനിയാഴ്ച രാത്രി വീട്ടിലെത്തിയ അജ്ഞാതന്‍ സുഖ് വീന്ദറിന് നേരേ വെടിയുതിര്‍ക്കുകയായിരുന്നു. ശേഷം കിരണ്‍ദീപിനെയും ഇയാള്‍ പോയിന്റ് ബ്ലാങ്കില്‍ വെടിവെച്ചു.

സുഖ് വീന്ദറിന്റെ സഹോദരന്‍ ലഖ് വീര്‍ സിങും മനിലയിലാണ് താമസം. ഏതാനുംദിവസം മുന്‍പ് ഒരു ചടങ്ങില്‍ പങ്കെടുക്കാനായി ഇയാൾ നാട്ടിലെത്തിയിരുന്നു. ഞായറാഴ്ച രാവിലെ മുതല്‍ സഹോദരനെ ഫോണില്‍ കിട്ടായതോടെ ലഖ് വീര്‍ സിങ് മനിലയിലുള്ള ബന്ധുവിനോട് സുഖ് വീന്ദറിന്റെ വീട്ടില്‍ പോയി അന്വേഷിക്കാന്‍ ആവശ്യപ്പെട്ടു. തുടര്‍ന്ന് ബന്ധു വീട്ടിലെത്തി അന്വേഷിച്ചതോടെയാണ് കൊലപാതക വിവരം പുറംലോകമറിയുന്നത്.