വെള്ളച്ചാട്ടത്തിലെത്തിയ യുവതികളോട് മോശമായി പെരുമാറിയ സംഭവം; പോലീസുകാർക്ക് സസ്പെൻഷൻ

മൂവാറ്റുപുഴ : സംസ്ഥാന പോലീസ് സേനയെ നാണം കെടുത്തിക്കൊണ്ട് പിറവം അരീക്കൽ വെള്ളച്ചാട്ടത്തിൽ ഉല്ലസിക്കാനെത്തിയ യുവതികളോട് പോലീസുകാർ അപമര്യാദയായി പെരുമാറിയ സംഭവത്തിൽ 2 സിവിൽ പൊലീസ് ഓഫിസർമാരെ സസ്പെൻഡ് ചെയ്തു. മൂവാറ്റുപുഴ സ്റ്റേഷനിലെ സിവില്‍ പൊലീസ് ഓഫിസര്‍മാരായ പരീത്, ബൈജു എന്നിവർക്കാണ് സംഭവത്തിൽ സസ്‌പെന്‍ഷൻ ലഭിച്ചത്. ചെയ്തത്. ഇവരെ ഇന്നലെ രാമമംഗലം പൊലീസ് കസ്റ്റഡിയിലെടുത്തിരുന്നു. പരീതിനെ അറസ്റ്റ് ചെയ്തു കോടതിയില്‍ ഹാജരാക്കി. ബൈജുവിനെ വിട്ടയച്ചു.

പിറവം അരീക്കൽ വെള്ളച്ചാട്ടത്തിൽ ഇന്നലെ വൈകുന്നേരമായിരുന്നു സംഭവം. അവധി ദിനമായതിനാൽ വെള്ളച്ചാട്ടത്തിലും പരിസരത്തും സാമാന്യം നല്ല തിരക്കുണ്ടായിരുന്നു. വെള്ളച്ചാട്ടത്തിന്റെ താഴ്ഭാഗത്തു നിന്നിരുന്ന യുവതികൾ ഉൾപ്പെടുന്ന സംഘത്തോടു മഫ്തിയിലായിരുന്ന ഇരുവരും കയർക്കുകയായിരുന്നു. ഇതിനിടയിലാണ് ഒരാൾ അപമര്യാദയായി പെരുമാറിയതെന്നാണു വിവരം. യുവതികൾ പ്രതികരിച്ചതോടെ വാക്കേറ്റവും കയ്യാങ്കളിയും ഉണ്ടായി. നാട്ടുകാർ ഒടുവിൽ ഇവരെ ചെരിപ്പ് ഊരി തല്ലി എന്ന റിപ്പോർട്ടും പുറത്ത് വന്നിരുന്നു.