റോബർട്ട് വാദ്ര കുടുങ്ങി? പരിശോധന, റെയ്ഡ് ഉടൻ?

ദില്ലി: അനധികൃത സ്വത്ത് സമ്പാദനക്കേസിൽ സോണിയ ഗാന്ധിയുടെ മരുമകന്‍ റോബര്‍ട്ട് വാദ്രയുടെ മൊഴിയെടുക്കാനൊരുങ്ങി ആദായനികുതി വകുപ്പ്. ഇതിനായി ആദായനികുതി വകുപ്പ് ഉദ്യോഗസ്ഥര്‍ റോബര്‍ട്ട് വാദ്രയുടെ ഓഫീസില്‍ എത്തി. കിഴക്കന്‍ ദില്ലിയിലെ സുഖ്‌ദേവ് വിഹാറില്‍ സ്ഥിതി ചെയ്യുന്ന ഓഫീസിലാണ് ഉദ്യോഗസ്ഥരെത്തിയത്. വസ്​തു ഇടപാടുമായി ബന്ധപ്പെട്ടാണ്​ മൊഴിയെടുപ്പ്. ഓഫിസിൽ പരിശോധനക്കായല്ല പോകുന്നതെന്ന്​ ആദായനികുതി വകുപ്പ്​ നേരത്തെ അറിയിച്ചിരുന്നു.

ലണ്ടനില്‍ കോടിക്കണക്കിന് മൂല്യംവരുന്ന വസ്തുവകകകള്‍ സമ്പാദിച്ചെന്ന കേസില്‍ വാദ്രയ്‌ക്കെതിരെ നിലവില്‍ അന്വേഷണം പുരോഗമിച്ചു കൊണ്ടിരിക്കുകയാണ്. 2018ൽ രജിസ്റ്റർ ചെയ്​ത കേസിൽ എൻഫോഴ്​സ്​മെന്‍റ്​ ഡയറക്​ടറേറ്റ്​ പലതവണ വാദ്രയെ ചോദ്യം ചെയ്​തിരുന്നു. 2015ൽ വദ്രയുടെ കമ്പനിക്കെതിരെ കള്ളപ്പണം വെളുപ്പിക്കലിന്​ മറ്റൊരു കേസ്​ രജിസ്​റ്റർ ചെയ്​തിരുന്നു. കൂടാതെ ഗുരുഗ്രാമിലെ ഭൂമി ഇടപാടുമായി ബന്ധപ്പെട്ടും വദ്രക്കെതിരെ കേസ്​ അന്വേഷണം നടക്കുന്നുണ്ട്​. എന്നാൽ കേസുകളെല്ലാം രാഷ്ട്രീയപ്രേരിതമാണെന്നാണ് വാദ്രയുടെ വാദം.