സ്വാതന്ത്യദിനാഘോഷം! വന്ദേമാതരം ആലപിക്കണമെന്ന് മദ്രാസ് ഹൈക്കോടതി !തമിഴ് തായ് വാഴ്ത്തിനെക്കുറിച്ച് പരാമർശമില്ല

ചെന്നൈ : സ്വാതന്ത്ര്യ ദിനാഘോഷത്തിൽ വന്ദേ മാതരം കർശനമായി ആലപിക്കണമെന്ന ഉത്തരവുമായി മദ്രാസ് ഹൈക്കോടതി. ചെന്നൈയിലെ പ്രിൻസിപ്പൽ സീറ്റിലും മധുര ബെഞ്ചിലും ജില്ലാ ജുഡീഷ്യറികൾക്ക് കീഴിലുമുള്ള സ്വാതന്ത്ര്യദിനാഘോഷ പരിപാടികൾ ‘വന്ദേമാതരം’ ആലപിച്ചോ വാദ്യോപകരണങ്ങളിൽ വായിച്ചോ ആയിരിക്കും ആരംഭിക്കുകയെന്ന് കോടതിയുടെ സർക്കുലറിൽ വ്യക്തമാക്കി. ദേശീയ ഗാനത്തിന് തൊട്ടുമുമ്പായി ‘വന്ദേമാതരം’ ഉൾപ്പെടുത്താനാണ് തീരുമാനം.

ഔദ്യോഗിക ചടങ്ങുകളിൽ ‘തമിഴ് തായ് വാഴ്ത്തു’ ആദ്യം തന്നെ ആലപിക്കണമെന്ന് തമിഴ്നാട് സർക്കാർ ഉത്തരവിട്ട് ദിവസങ്ങൾക്കകമാണ് ഹൈക്കോടതിയുടെ പുതിയ നടപടി. എന്നാൽ ഹൈക്കോടതിയുടെ പുതിയ ഉത്തരവിൽ ‘തമിഴ് തായ് വാഴ്ത്തു’ പരാമർശിച്ചിട്ടില്ല. ‘വന്ദേമാതരം’ കഴിഞ്ഞ് ദേശീയ പതാക ഉയർത്തലും തുടർന്ന് ദേശീയ ഗാനാലാപനവുമാണ് ചടങ്ങിന്റെ ക്രമമെന്ന് സർക്കുലറിൽ വ്യക്തമാക്കുന്നു.

സർവകലാശാലകളിലെയും സർക്കാർ ചടങ്ങുകളിലെയും ഔദ്യോഗിക പ്രോട്ടോക്കോളുമായി ബന്ധപ്പെട്ട് തമിഴ്നാട്ടിൽ അടുത്തിടെ വലിയ വിവാദങ്ങൾ ഉടലെടുത്തിരുന്നു. മനോന്മണ്യം സുന്ദരനാർ സർവകലാശാലയുടെ ബിരുദദാന ചടങ്ങിൽ ‘തമിഴ് തായ് വാഴ്ത്തു’ ഒഴിവാക്കി വന്ദേമാതരം ആദ്യം പാടിയതുമായി ബന്ധപ്പെട്ട് ഡിഎംകെ എംപിമാർ ഗവർണർക്ക് കത്തയച്ചിരുന്നു. മദ്രാസ് ഹൈക്കോടതിക്ക് പുറമെ തമിഴ്നാട് സ്റ്റേറ്റ് ജുഡീഷ്യൽ അക്കാദമി, ജില്ലാ ജുഡീഷ്യറി യൂണിറ്റുകൾ, പുതുച്ചേരി എന്നിവിടങ്ങളിലും ഈ പ്രോട്ടോക്കോൾ ബാധകമായിരിക്കും.