ബഹിരാകാശ കുതിപ്പിൽ ചരിത്രം കുറിക്കാൻ ഇന്ത്യ: രാജ്യത്തെ ആദ്യ സ്വകാര്യ ഓർബിറ്റൽ റോക്കറ്റ് ‘വിക്രം-1’ വിക്ഷേപണത്തിന് സജ്ജം; ‘മിഷൻ ആഗമൻ’ ദൗത്യത്തിന് മണിക്കൂറുകൾ മാത്രം

ശ്രീഹരിക്കോട്ട: ഇന്ത്യൻ ബഹിരാകാശ രംഗത്ത് പുതിയൊരു ചരിത്ര അധ്യായം രചിച്ചുകൊണ്ട് രാജ്യത്തെ ആദ്യത്തെ സ്വകാര്യ ഓർബിറ്റൽ ക്ലാസ് റോക്കറ്റായ ‘വിക്രം-1’ വിക്ഷേപണത്തിന് ഒരുങ്ങി. ഹൈദരാബാദ് ആസ്ഥാനമായി പ്രവർത്തിക്കുന്ന പ്രമുഖ സ്പേസ്-ടെക് സ്റ്റാർട്ടപ്പായ സ്കൈറൂട്ട് എയറോസ്പേസ് വികസിപ്പിച്ചെടുത്ത റോക്കറ്റ് ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിലെ ഒന്നാം വിക്ഷേപണത്തറയിൽ നിന്നാണ് കുതിച്ചുയരുക. ‘മിഷൻ ആഗമൻ’ എന്ന് പേരിട്ടിരിക്കുന്ന ഈ ദൗത്യം ഇന്ത്യയുടെ സ്വകാര്യ ബഹിരാകാശ മേഖലയിലെ ഏറ്റവും വലിയ നിർണ്ണായക നാഴികക്കല്ലായാണ് വിലയിരുത്തപ്പെടുന്നത്. ഇതുവരെ ഐ.എസ്.ആർ.ഒയുടെ നേതൃത്വത്തിൽ മാത്രം നടന്നിരുന്ന ഉപഗ്രഹ വിക്ഷേപണ രംഗത്തേക്ക് സ്വകാര്യ പങ്കാളിത്തം പൂർണ്ണമായ തോതിൽ എത്തുന്നതിന്റെ വിളംബരം കൂടിയാണ് ഈ ദൗത്യം.

പൂർണ്ണമായും കാർബൺ കോമ്പോസിറ്റ് ഘടനയിൽ അത്യാധുനിക ത്രീഡി പ്രിന്റഡ് എഞ്ചിനുകളുടെ കരുത്തിൽ നിർമ്മിച്ച ഏഴ് നിലകളുടെ ഉയരമുള്ള ബഹിരാകാശ വാഹനമാണ് വിക്രം-1. മൂന്ന് ഘട്ടങ്ങളിലായി പൂർണ്ണമായും ഘര ഇന്ധനം ഉപയോഗിച്ച് പ്രവർത്തിക്കുന്ന ഈ റോക്കറ്റിന് 350 കിലോഗ്രാം ഭാരമുള്ള ഉപഗ്രഹങ്ങളെ ഭൂമിയിൽ നിന്നും 450 കിലോമീറ്റർ അകലെയുള്ള താഴ്ന്ന ഭ്രമണപഥത്തിൽ എത്തിക്കാൻ ശേഷിയുണ്ട്. സ്കൈറൂട്ട് ലോഞ്ച് കൺട്രോൾ സെന്ററിൽ നിന്നുള്ള അവസാനഘട്ട പരിശോധനകളും ടെലിമെട്രി ഗ്രൗണ്ട് സ്റ്റേഷനുകളുമായുള്ള ബന്ധിപ്പിക്കലും വിജയകരമായി പൂർത്തിയായതായി അധികൃതർ വ്യക്തമാക്കി. വെറും 15 മിനിറ്റും 46 സെക്കൻഡും കൊണ്ട് വിക്രം-1 അതിന്റെ ആദ്യ പരീക്ഷണ ദൗത്യം പൂർത്തിയാക്കുമെന്നാണ് കണക്കാക്കുന്നത്.
ആദ്യത്തെ പരീക്ഷണ വിക്ഷേപണം ആയതിനാൽ വലിയ ഉപഗ്രഹങ്ങൾക്ക് പകരം ജർമ്മനിയിൽ നിന്നുള്ളവ ഉൾപ്പെടെയുള്ള നാല് പ്രധാന സാങ്കേതിക പേലോഡുകളാണ് റോക്കറ്റ് വഹിക്കുന്നത്. ബഹിരാകാശ അവശിഷ്ടങ്ങളുടെ നിർമ്മാർജ്ജനം ലക്ഷ്യമിട്ടുള്ള റോബോട്ടിക് കൈ ഉൾപ്പെടെയുള്ള സവിശേഷമായ ഉപകരണങ്ങൾ ഇതിലുണ്ട്. കൂടാതെ വിഖ്യാത ശാസ്ത്രജ്ഞരായ സി.വി. രാമൻ, വിക്രം സാരാഭായ്, എ.പി.ജെ. അബ്ദുൽ കലാം എന്നിവരുടെ 18 കാരറ്റ് സ്വർണ്ണത്തിൽ തീർത്ത മിനിയേച്ചർ രൂപങ്ങളും കോസ്മോസ് ഡയമണ്ട്സിന്റെ പ്രത്യേക ആർട്ട് വർക്കും റോക്കറ്റിൽ ഇടംപിടിച്ചിട്ടുണ്ട്. ഇന്ത്യൻ യുവാക്കളുടെ കഴിവിന്റെയും നിശ്ചയദാർഢ്യത്തിന്റെയും തെളിവാണ് ഈ ദൗത്യമെന്ന് പ്രശംസിച്ച പ്രധാനമന്ത്രി നരേന്ദ്ര മോദി, സ്കൈറൂട്ട് ടീമിന് പൂർണ്ണ പിന്തുണയും ആശംസകളും നേർന്നു.