ഇൻഡോർ: കൈ വേദനയ്ക്ക് യൂട്യൂബ് നോക്കി സ്വന്തമായി മരുന്ന് ഉണ്ടാക്കി കഴിച്ചയാള് മരിച്ചതായി റിപ്പോര്ട്ട്. മധ്യപ്രദേശിലെ ഇൻഡോറിലെ സ്വര്ണ്ണബാഗില് താമസിക്കുന്ന ധര്മേന്ദ്ര കൊറോലെ (32) ആണ് മരിച്ചത്. യൂട്യൂബില് നോക്കി വനമേഖലയില് നിന്നുള്ള പ്രത്യേക ഫലം ഉപയോഗിച്ച് ജ്യൂസ് ഉണ്ടാക്കുകയായിരുന്നുവെന്നാണ് വിവരം. പോസ്റ്റുമോര്ട്ടം റിപ്പോര്ട്ട് പുറത്ത് വന്നാല് മാത്രമേ കൂടുതല് വിവരങ്ങള് ലഭിക്കുകയുള്ളൂവെന്ന് പൊലീസ് പറഞ്ഞു.
ഡ്രൈവറായി ജോലി ചെയ്യുകയായിരുന്നു ധര്മേന്ദ്ര. ഇതിനിടയില്, അദ്ദേഹം ഒരു അപകടത്തില് പെടുകയും കൈയ്ക്ക് പരിക്കേല്ക്കുകയും ചെയ്തു. പലയിടത്തും ചികിത്സ തേടിയെങ്കിലും കൈവേദന മാറിയില്ല. തുടര്ന്ന് യൂട്യൂബില് നോക്കി മരുന്ന് ഉണ്ടാക്കാന് തീരുമാനിച്ചു. കാട്ടില് കാണുന്ന ചില പഴങ്ങള് പറിച്ചെടുത്ത് ജ്യൂസ് ഉണ്ടാക്കിയാല് വേദന മാറുമെന്ന് യൂട്യൂബില് നിന്ന് ലഭിച്ച വിവരത്തെ തുടര്ന്നാണ് ഇയാള് ഇവ ശേഖരിച്ച് ജ്യൂസ് ഉണ്ടാക്കി കുടിച്ചതെന്ന് പൊലീസ് പറഞ്ഞു.
ജ്യൂസ് കുടിച്ച ശേഷം വയറിളക്കവും ഛര്ദ്ദിയും ഉണ്ടായി. ധര്മ്മേന്ദ്രയെ ഉടന് തന്നെ ബന്ധുക്കള് ആശുപത്രിയിലെത്തിച്ചു. പക്ഷേ, ജീവന് രക്ഷിക്കാനായില്ല. കഴിഞ്ഞ കുറെ വര്ഷങ്ങളായി ഭാര്യയ്ക്കും രണ്ട് മക്കള്ക്കുമൊപ്പം ഇൻഡോറിലാണ് ഇയാള് താമസിച്ചിരുന്നത്. ബന്ധുക്കളുടെ മൊഴിയും പോലീസ് രേഖപ്പെടുത്തുകയും ചെയ്തു.
