അവസാനമായി ഇന്നച്ചൻ സ്വന്തം വസതിയിലെത്തി; സംസ്കാരം നാളെ രാവിലെ പത്ത് മണിക്ക്

കൊച്ചി∙ അന്തരിച്ച പ്രശസ്ത ചലച്ചിത്ര താരവും താര സംഘടനായ അമ്മയുടെ മുൻ പ്രസിഡന്റും ചാലക്കുടി മുൻ എംപിയുമായ ഇന്നസന്റിന്റെ മൃതദേഹം ഇരിങ്ങാലക്കുട ടൗൺ ഹാളിലെ പൊതുദർശനത്തിനു ശേഷം അദ്ദേഹത്തിന്റെ വസതിലെത്തിച്ചു. നേരത്തെ മുഖ്യമന്ത്രി പിണറായി വിജയൻ ഉൾപ്പെടെയുള്ളവർ ഇരിങ്ങാലക്കുട ടൗൺ ഹാളിലെത്തി അന്തിമോപചാരം അർപ്പിച്ചിരുന്നു. ഇരിങ്ങാലക്കുട സെന്റ് തോമസ് കത്തീഡ്രലിൽ നാളെ രാവിലെ 10നാണ് പ്രിയ നടന്റെ സംസ്കാര ചടങ്ങുകൾ നടക്കുക.

ചലച്ചിത്ര, രാഷ്ട്രീയ രംഗത്തെ നിരവധി പ്രമുഖരും സഹപ്രവർത്തകരും രാവിലെ 8 നും 11.30 നും ഇടയ്ക്ക് കടവന്ത്ര രാജീവ്ഗാന്ധി ഇൻഡോർ സ്റ്റേഡിയത്തിൽ ആദരാഞ്ജലിയർപ്പിക്കാനെത്തിയിരുന്നു.നടന്മാരായ മമ്മൂട്ടി, ജയസൂര്യ, ഹരിശ്രീ അശോകൻ, മുകേഷ്, കുഞ്ചൻ, ദുൽഖർ സൽമാൻ, ബാബുരാജ്, സംവിധായൻ ലാൽ ജോസ്, മന്ത്രിമാരായ ആർ.ബിന്ദു, കെ.രാജൻ, പി.പ്രസാദ്, പ്രതിപക്ഷ നേതാവ് വി.ഡി.സതീശൻ എന്നിവരുൾപ്പെടെ ആദരാഞ്ജലി അർപ്പിച്ചു.