പൊലീസിനെതിരായ അര്‍ച്ചന കവിയുടെ ആരോപണം; കൊച്ചി എസ്‌എച്ച്‌ഒക്കെതിരെ ഉടൻ നടപടിയുണ്ടാകുമെന്ന് സിറ്റി പൊലീസ് കമ്മീഷണര്‍

കൊച്ചി: പൊലീസിനെതിരായ നടി അര്‍ച്ചന കവിയുടെ ആരോപണം ആഭ്യന്തര അന്വേഷണം നടത്തിയെന്ന് കൊച്ചി പൊലീസ് കമ്മീഷണര്‍. അര്‍ച്ചന കവിയുടെ പരാമര്‍ശത്തില്‍ നടപടിയുണ്ടാകുമെന്ന് സിറ്റി പൊലീസ് കമ്മീഷണര്‍ സി.എച്ച്‌.നാഗരാജു. പൊലീസിനെതിരായ പരാമര്‍ശത്തില്‍ ഫോര്‍ട്ട് കൊച്ചി എസ്‌എച്ച്‌ഒക്കെതിരെ നടപടിസ്വീകരിക്കും. എസ് എച്ച്‌ ഒ ബിജുവിന്റെ ഭാഗത്ത് തെറ്റ് സംഭവിച്ചതായി കണ്ടെത്തി. ഇന്നോ നാളെയോ നടപടിയെടുക്കുമെന്ന് കൊച്ചി കമ്മീഷണര്‍ സി.എച്ച്‌.നാഗരാജു ട്വന്റിഫോറിനോട് വ്യക്തമാക്കി.

പൊലീസിനെതിരായ നടി അര്‍ച്ചന കവിയുടെ ഇന്‍സ്റ്റാഗ്രാം പോസ്റ്റില്‍ കൊച്ചി പൊലീസ് ആഭ്യന്തര അന്വേഷണം ആരംഭിച്ചിട്ടുണ്ട്. കഴിഞ്ഞ ദിവസം രാത്രിയില്‍ സ്ത്രീകള്‍ മാത്രം യാത്ര ചെയ്ത ഓട്ടോ തടഞ്ഞ് കൊച്ചി പൊലീസ് മോശമായി പെരുമാറി എന്നാണ് നടി ഇന്‍സ്റ്റാഗ്രാം കുറിപ്പില്‍ ആരോപണം ഉന്നയിച്ചത്. ഓട്ടോയില്‍ സുഹൃത്തിനും കുടുംബത്തിനുമൊപ്പം ഫോര്‍ട്ട് കൊച്ചിയിലേക്ക് യാത്ര ചെയ്യുന്നതിനിടെ ആണ് സംഭവം. ഓട്ടോ തടഞ്ഞ് നിര്‍ത്തിയ പൊലീസ് രൂക്ഷമായ ഭാഷയിലാണ് വിവരങ്ങള്‍ ചോദിച്ചതെന്നും മുഴുവന്‍ കാര്യങ്ങള്‍ പറഞ്ഞിട്ടും പിന്തുടര്‍ന്നെന്നുമാണ് പോസ്റ്റില്‍ നടി വ്യക്തമാക്കിയിരിക്കുന്നത്.

ഇന്‍സ്റ്റാഗ്രാം പോസ്റ്റിനെ തുടര്‍ന്ന് ഔദ്യോഗികമായി പൊലീസ് തന്നെ സമീപിച്ചിട്ടില്ലെന്ന് അര്‍ച്ചന പറഞ്ഞു. പരാതിയുമായി മുന്നോട്ട് പോകാന്‍ താത്പര്യമില്ലെന്നും തന്‍റെ അനുഭവം മറ്റുള്ളവര്‍ കൂടി അറിയാനാണ് സമൂഹമാധ്യമത്തില്‍ പോസ്റ്റ് ചെയ്തതെന്നും നടി പ്രതികരിച്ചു. കേരള പൊലീസില്‍ നിന്നും നേരിട്ട മോശം അനുഭവം തുറന്നുപറഞ്ഞായിരുന്നു നടി അര്‍ച്ചന കവിയുടെ പോസ്റ്റ്.