ഐപിഎൽ ലേലം:അന്തിമ ലേലപ്പട്ടികയായി; ആകെ 590 താരങ്ങള്‍; ശ്രീശാന്തിനും ഇടം

മുംബൈ: ഐപിഎല്‍ (IPL) കളിക്കാരുടെ ലേലത്തിന്‍റെ അന്തിമ പട്ടിക പുറത്ത്. അന്തിമ പട്ടികയില്‍ 590 താരങ്ങളാണ് ഉള്‍പ്പെട്ടിരിക്കുന്നത്. ഇന്ത്യയുടെ കേരള പേസര്‍ എസ് ശ്രീശാന്ത് 50 ലക്ഷം അടിസ്ഥാന വിലക്ക് അന്തിമ ലേലപ്പട്ടികയില്‍ ഇടം പിടിച്ചിട്ടുണ്ട്. ബെംഗളൂരുവില്‍ ഫെബ്രുവരി 12, 13 തിയതികളിലാണ് താരലേലം. രണ്ടു കോടി രൂപയാണ് ലേലത്തില്‍ മാര്‍ക്വീ പട്ടികയില്‍ ഇടംപിടിച്ച താരങ്ങളുടെ ഉയര്‍ന്ന അടിസ്ഥാന വില.

590 ക്രിക്കറ്റ് താരങ്ങളില്‍ 228 പേര്‍ ക്യാപ്‌ഡ് കളിക്കാരും 355 പേര്‍ അണ്‍ക്യാപ്‌ഡ് താരങ്ങളുമാണ്. ഐസിസിയുടെ അസോസിയേറ്റ് രാജ്യങ്ങളില്‍ നിന്ന് ഏഴ് താരങ്ങളും അന്തിമ പട്ടികയില്‍ പേരുകാരായി. ആകെ താരങ്ങളില്‍ 370 പേരാണ് ഇന്ത്യയില്‍ നിന്നുള്ളത്. 220 താരങ്ങള്‍ വിദേശികള്‍.

രണ്ടു കോടി രൂപയാണ് ലേലത്തില്‍ മാര്‍ക്വീ പട്ടികയില്‍ ഇടംപിടിച്ച താരങ്ങളുടെ ഉയര്‍ന്ന അടിസ്ഥാന വില. നാല് ഇന്ത്യന്‍ താരങ്ങളടക്കം 10 പേരാണ് ഈ പട്ടികയില്‍ ഇടംപിടിച്ചിരിക്കുന്നത്. ശിഖര്‍ ധവാന്‍, മുഹമ്മദ് ഷമി, ഫാഫ് ഡുപ്ലസിസ്, ഡേവിഡ് വാര്‍ണര്‍, പാറ്റ് കമ്മിന്‍സ്, ശ്രേയസ് അയ്യര്‍, ആര്‍ അശ്വിന്‍, ക്വിന്റണ്‍ ഡികോക്ക്, കാഗിസോ റബാഡ, ട്രെന്‍ഡ് ബോള്‍ട്ട് എന്നിവരാണ് മാര്‍ക്വീ താരങ്ങള്‍. ഏറ്റവും കൂടുതല്‍ വിദേശ താരങ്ങള്‍ അവസരം തേടുന്നത് ഓസ്‌ട്രേലിയയില്‍ നിന്നാണ്. 47 താരങ്ങളാണ് മെഗാ ലേലത്തിന്റെ അന്തിമ പട്ടികയില്‍ ഇടം പിടിച്ചിരിക്കുന്നത്.