യുഎസിനും ഇസ്രയേലിനും തിരിച്ചടി ; രാജ്യത്തെ ആദ്യത്തെ ഭൂഗർഭ വ്യോമ താവളത്തിന്റെ ദൃശ്യങ്ങൾ ഇറാൻ പുറത്തുവിട്ടു; കൈയ്യിലുള്ളതാകട്ടെ അറു പഴഞ്ചൻ യുദ്ധ വിമാനങ്ങളും

ടെഹ്‌റാന്‍ : യുഎസിനും ഇസ്രയേലിനും കനത്ത തിരിച്ചടിയാകുമെന്ന് അവകാശപ്പെട്ടുകൊണ്ട് രാജ്യത്തെ ആദ്യ ഭൂഗര്‍ഭ വ്യോമത്താവളമായ ‘ഉഘാബ് 44’ ന്റെ ചിത്രങ്ങൾ ഇറാൻ പുറത്തു വിട്ടു. ലോങ് റേഞ്ച് ക്രൂസ് മിസൈലുകള്‍ ഘടിപ്പിച്ചിരിക്കുന്ന ഫൈറ്റര്‍ ജെറ്റ് വിമാനങ്ങള്‍ മുഴുവന്‍ സമയയവും അടിയന്തിര സാഹചര്യങ്ങൾക്കായി തയ്യാറാക്കി നിര്‍ത്താന്‍ വ്യോമത്താവളത്തില്‍ സൗകര്യമുണ്ടെന്നാണ് അവകാശപ്പെടുന്നത്. ഇറാന്റെ ഔദ്യോഗിക വാര്‍ത്താഏജന്‍സിയായ ഐആര്‍എന്‍എ ആണ് വ്യോമതാവളത്തിന്റെ ചിത്രങ്ങൾ പുറത്തു വിട്ടത്ചിത്രത്തിൽ യുഎസ് നിര്‍മിത F-4E ഫാന്റം II ഫൈറ്റര്‍ ബോംബര്‍ വിമാനങ്ങളെ കാണാം. ‘ഉഘാബ്’ എന്ന പേര്‍ഷ്യന്‍ പദത്തിന് ‘കഴുകന്‍’ എന്നാണര്‍ഥം.

1979 നു മുമ്പ് ഇറാന്‍ കരസ്ഥമാക്കിയ യുദ്ധവിമാനങ്ങളാണ് F-4E ഫാന്റം II ഫൈറ്റര്‍ ബോംബേഴ്‌സ്. ഇന്നത്തെ സാഹചര്യത്തിൽ ഈ വിമാനങ്ങൾ അറു പഴഞ്ചനാണെന്ന് നിസംശയം പറയാം. ഡ്രോണുകള്‍ കൂടാതെ എല്ലാതരത്തിലെ ഫൈറ്റര്‍ ജെറ്റ് വിമാനങ്ങളും ബോംബര്‍ വിമാനങ്ങളും വ്യോമത്താവളത്തില്‍ സൂക്ഷിക്കാന്‍ സാധിക്കും. മലനിരകള്‍ക്കുള്ളില്‍ നൂറ് കണക്കിന് മീറ്ററുകള്‍ ആഴത്തിലാണ് ഭൂഗര്‍ഭ വ്യോമത്താവളം. സുരക്ഷാപ്രശ്നങ്ങൾ മുൻനിർത്തി വ്യോമത്താവളത്തിന്റെ സ്ഥാനം ഇറാൻ വെളിപ്പെടുത്തിയിട്ടില്ല.