ഇറാനുമായി ഇടപാടുണ്ടോ? എങ്കിൽ 25% അധിക നികുതി; ഉത്തരവിൽ ഒപ്പിട്ട് ട്രമ്പ് ; ചൈനയ്ക്കും തിരിച്ചടി

വാഷിംഗ്ടൺ: ഇറാനുമായി സാമ്പത്തിക-വ്യാപാര ബന്ധം തുടരുന്ന രാജ്യങ്ങളിൽ നിന്നുള്ള ഉൽപ്പന്നങ്ങൾക്ക് മേൽ 25 ശതമാനം വരെ അധിക നികുതി ചുമത്താൻ അമേരിക്കൻ പ്രസിഡന്റ് ഡൊണാൾഡ് ട്രമ്പ് ഉത്തരവിട്ടു. ഇറാനുമായുള്ള ദേശീയ അടിയന്തരാവസ്ഥാ ഉത്തരവ് പുതുക്കിക്കൊണ്ട് ഒപ്പിട്ട എക്സിക്യൂട്ടീവ് ഓർഡറിലാണ് ഇക്കാര്യം ട്രമ്പ് പ്രഖ്യാപിച്ചത്. ഇറാനിൽ നിന്ന് നേരിട്ടോ അല്ലാതെയോ ചരക്കുകളും സേവനങ്ങളും വാങ്ങുന്ന രാജ്യങ്ങൾ ഈ കടുത്ത നികുതി നടപടി നേരിടേണ്ടി വരും.

അമേരിക്കയുടെ ദേശീയ സുരക്ഷയും വിദേശനയവും സാമ്പത്തിക താൽപ്പര്യങ്ങളും സംരക്ഷിക്കുന്നതിന്റെ ഭാഗമായാണ് ഈ നടപടിയെന്ന് വൈറ്റ് ഹൗസ് വ്യക്തമാക്കി. ഇറാന്റെ ആണവ മോഹങ്ങൾക്കും ഭീകരവാദ പ്രവർത്തനങ്ങൾക്കുമുള്ള സാമ്പത്തിക സ്രോതസ്സ് തടയുകയാണ് ട്രമ്പിന്റെ ലക്ഷ്യം. ഇറാനുമായുള്ള ബന്ധം അവസാനിപ്പിക്കാനോ അമേരിക്കയുടെ സുരക്ഷാ നയങ്ങളുമായി സഹകരിക്കാനോ തയ്യാറാകുന്ന രാജ്യങ്ങൾക്ക് ഇളവ് നൽകാൻ പ്രസിഡന്റിന് അധികാരമുണ്ടാകും. സ്റ്റേറ്റ് സെക്രട്ടറി, വാണിജ്യ സെക്രട്ടറി എന്നിവർക്കായിരിക്കും കരാർ നടപ്പിലാക്കാനുള്ള ചുമതല.

ഇറാനിൽ കഴിയുന്ന അമേരിക്കൻ പൗരന്മാർക്ക് അമേരിക്കൻ സർക്കാർ പ്രത്യേക ജാഗ്രതാ നിർദ്ദേശം നൽകിയിട്ടുണ്ട്. നിലവിൽ ഇറാനുമായി നയതന്ത്ര ബന്ധമില്ലാത്തതിനാൽ എത്രയും വേഗം രാജ്യം വിടാനാണ് നിർദ്ദേശം. ട്രമ്പിന്റെ ആദ്യ ഭരണകാലത്ത് നടപ്പിലാക്കിയ ‘മാക്സിമം പ്രഷർ’ നയം വീണ്ടും ശക്തമാക്കുന്നതിന്റെ സൂചനയാണിത്. ഈ തീരുമാനം ഇറാനുമായി എണ്ണ ഇടപാടുകൾ നടത്തുന്ന രാജ്യങ്ങളെയും ചൈന ഉൾപ്പെടെയുള്ള വൻശക്തികളെയും വലിയ തോതിൽ ബാധിക്കുമെന്നാണ് സാമ്പത്തിക വിദഗ്ധർ വിലയിരുത്തുന്നത്.