ദില്ലി: ഇന്ത്യയിലേക്ക് ഭീകരവാദം കയറ്റുമതി ചെയ്യുന്നതിൽ പാക് ചാര സംഘടനയായ ഐഎസ്ഐയിലെ (ഇന്റർ-സർവീസസ് ഇന്റലിജൻസ്)”S1″ എന്ന യൂണിറ്റിന് സുപ്രധാന പങ്കുണ്ടെന്ന് രഹസ്യാന്വേഷണ റിപ്പോർട്ട്. 1993-ലെ മുംബൈ സ്ഫോടനങ്ങൾ മുതൽ ജമ്മു കശ്മീരിലെ പഹൽഗാമിൽ വിനോദസഞ്ചാരികൾക്ക് നേരെയുണ്ടായ സമീപകാല ആക്രമണം വരെ ഈ യൂണിറ്റിന് പങ്കുണ്ടെന്നാണ് റിപ്പോർട്ടുകൾ.
ഇന്റലിജൻസ് വൃത്തങ്ങൾ നൽകുന്ന സൂചനകൾ അനുസരിച്ച്, “സബ്വേർഷൻ 1” എന്നതിന്റെ ചുരുക്കപ്പേരാണ് S1. അതിർത്തി കടന്നുള്ള ഭീകരപ്രവർത്തനങ്ങൾക്ക് പിന്നിലെ ഏറ്റവും വലിയ ചാലകശക്തി ഈ യൂണിറ്റാണെന്ന് വൃത്തങ്ങൾ പറയുന്നു. പാകിസ്ഥാൻ ആർമിയിലെ ഒരു കേണലാണ് S1 യൂണിറ്റിന് നേതൃത്വം നൽകുന്നത്. രണ്ട് റാങ്കിംഗ് ഓഫീസർമാർ ഇതിന്റെ ഓപ്പറേഷനുകൾക്ക് മേൽനോട്ടം വഹിക്കുന്നു. ഇവരുടെ കോഡ് നാമങ്ങൾ ‘ഗാസി 1’ എന്നും ‘ഗാസി 2’ എന്നുമാണ്. S1-ന്റെ ആസ്ഥാനം ഇസ്ലാമാബാദിലാണ്. ഇവരുടെ ഭീകര പ്രവർത്തനങ്ങൾക്കുള്ള പണത്തിന്റെ പ്രധാന സ്രോതസ്സ് മയക്കുമരുന്ന് കടത്തിലൂടെയുള്ള വരുമാനം ആണെന്നും റിപ്പോർട്ടുകളുണ്ട്.
S1-ലെ ഉദ്യോഗസ്ഥരും പരിശീലകരും എല്ലാത്തരം ബോംബുകളും ഇംപ്രൊവൈസ്ഡ് എക്സ്പ്ലോസീവ് ഡിവൈസുകളും (IEDs) നിർമ്മിക്കുന്നതിൽ വിദഗ്ദ്ധരാണ്. കൂടാതെ, വിവിധതരം ചെറു ആയുധങ്ങൾ കൈകാര്യം ചെയ്യുന്നതിലും ഇവർക്ക് വൈദഗ്ധ്യമുണ്ട്. ഇന്ത്യയിലെ മിക്ക സ്ഥലങ്ങളുടെയും വിശദമായ ഭൂപടങ്ങൾ ഇവരുടെ കൈവശമുണ്ടെന്നും കരുതപ്പെടുന്നു.
കഴിഞ്ഞ 25 വർഷമായി S1 പ്രവർത്തിക്കുന്നുണ്ടെങ്കിലും, അതിന്റെ പ്രവർത്തനങ്ങളുടെ പൂർണ്ണ വ്യാപ്തി ഇന്ത്യൻ സുരക്ഷാ ഏജൻസികൾ മനസ്സിലാക്കിയത് ഈ അടുത്ത കാലത്താണ്. ഇന്ത്യയിൽ ഭീകരാക്രമണങ്ങൾ നടത്താൻ പ്രത്യേകമായി ചുമതലപ്പെടുത്തിയ ഈ യൂണിറ്റ്, പാകിസ്ഥാനിൽ പ്രവർത്തിക്കുന്ന എല്ലാ ഭീകരഗ്രൂപ്പുകളുമായും ബന്ധപ്പെട്ടിരിക്കുന്നു. ജെയ്ഷ്-ഇ-മുഹമ്മദ്, ലഷ്കർ-ഇ-തൊയ്ബ, ഹിസ്ബുൾ മുജാഹിദീ* തുടങ്ങിയ ഭീകരസംഘടനകളുടെ പരിശീലന ക്യാമ്പുകളിൽ S1 ഉദ്യോഗസ്ഥരെ കണ്ടിട്ടുണ്ട്. ഇവർ നീളമുള്ള താടി വളർത്തി പ്രാദേശിക വേഷങ്ങൾ ധരിച്ച് ഭീകരർക്കിടയിൽ ലയിച്ചു ചേരാൻ ശ്രമിക്കാറുണ്ട്.
S1 യൂണിറ്റിന്റെ പ്രവർത്തനം അതീവ രഹസ്യ സ്വഭാവമുള്ളതാണ്. തങ്ങളെ പരിശീലിപ്പിക്കുന്നത് S1-ൽ നിന്നുള്ളവരാണെന്ന് പല ഭീകരസംഘടനകൾക്കും അറിയില്ല. കഴിഞ്ഞ രണ്ട് പതിറ്റാണ്ടിനിടെ ആയിരക്കണക്കിന് ഭീകരർക്ക് ഈ യൂണിറ്റ് പരിശീലനം നൽകിയിട്ടുണ്ടെന്നും വൃത്തങ്ങൾ കൂട്ടിച്ചേർത്തു.
