ഭീകരബന്ധം ! ഗാസയിലെ 37 സന്നദ്ധ സംഘടനകൾക്ക് വിലക്കേർപ്പെടുത്തി ഇസ്രായേൽ

ജറൂസലേം: ഗാസയിൽ പ്രവർത്തിക്കുന്ന 37 അന്താരാഷ്ട്ര സന്നദ്ധ സംഘടനകൾക്ക് ഇസ്രായേൽ ഭരണകൂടം വിലക്കേർപ്പെടുത്തി. സംഘടനകളിലെ പാലസ്തീൻ ജീവനക്കാരുടെ വിശദമായ വിവരങ്ങൾ കൈമാറണമെന്ന നിർദ്ദേശം പാലിക്കാത്തതിനെത്തുടർന്നാണ് നാളെ മുതൽ ഇവരുടെ പ്രവർത്തനം തടയാൻ തീരുമാനിച്ചത്. വിവരങ്ങൾ സമർപ്പിക്കാനുള്ള സമയപരിധി ഇന്ന് അർദ്ധരാത്രിയോടെ അവസാനിക്കും. തീവ്രവാദത്തിൽ ഏർപ്പെട്ടിരിക്കുന്നതായോ ഹമാസുമായി ബന്ധമുള്ളതായോ കണ്ടെത്തിയിരിക്കുന്ന ജീവനക്കാർ ഉൾപ്പെടുന്ന എൻജിഒകളെ ആണ് ഇസ്രായേൽ നിരോധിക്കുന്നത്. തങ്ങളുടെ ജീവനക്കാരിൽ ചിലർക്ക് ഹമാസുമായോ മറ്റ് സായുധ ഗ്രൂപ്പുകളുമായോ ബന്ധമുണ്ടെന്ന് പുറത്തറിയുമെന്ന് ഭയന്നാണ് സംഘടനകൾ വിവരങ്ങൾ നൽകാത്തതെന്ന് ഇസ്രായേൽ ആരോപിച്ചു.

മെഡിക്കൽ ചാരിറ്റി സംഘടനയായ ഡോക്ടേഴ്സ് വിത്തൗട്ട് ബോർഡേഴ്സ് (MSF), നോർവീജിയൻ റീഫ്യൂജി കൗൺസിൽ, വേൾഡ് വിഷൻ ഇന്റർനാഷണൽ, കെയർ (CARE), ഓക്സ്ഫാം തുടങ്ങിയ പ്രമുഖ സംഘടനകളെല്ലാം ഇസ്രായേലിന്റെ ഈ പട്ടികയിൽ ഉൾപ്പെടുന്നു. ഈ സംഘടനകളിലെ ജീവനക്കാർക്ക് ഇസ്ലാമിക് ജിഹാദ് ഉൾപ്പെടെയുള്ള ഗ്രൂപ്പുകളുമായി ബന്ധമുണ്ടെന്നാണ് ഇസ്രായേൽ മന്ത്രാലയ വക്താവ് ഗിലാഡ് സ്വിക്ക് വ്യക്തമാക്കിയത്. ഒക്ടോബർ 7-ലെ ആക്രമണത്തെ നിഷേധിക്കുകയോ ഇസ്രായേലിനെ നിയമവിരുദ്ധമായി ചിത്രീകരിക്കാൻ ശ്രമിക്കുകയോ ചെയ്യുന്ന സംഘടനകളുടെ ലൈസൻസ് റദ്ദാക്കുമെന്നും അധികൃതർ മുന്നറിയിപ്പ് നൽകി. ഭീകരതയെ പിന്തുണയ്ക്കുന്നുവെന്ന് ആരോപിക്കുന്ന സംഘടനകൾ പലസ്തീൻ പ്രദേശങ്ങളിൽ പ്രവർത്തിക്കുന്നത് തടയുന്നതിനാണ് പുതിയ നിയന്ത്രണങ്ങൾ എന്ന് ഇസ്രായേൽ വ്യക്തമാക്കി.