ഇസ്രായേൽ – ഹമാസ് യുദ്ധം ; നാല് ദിവസത്തേക്ക് വെടിനിർത്താൻ തീരുമാനം ; ബന്ദികളെ ഘട്ടം ഘട്ടമായി വിട്ടയയ്ക്കും ; കരാറിന് അംഗീകാരം നൽകി ഇസ്രായേൽ മന്ത്രിസഭ

ടെൽ അവീവ് : ഹമാസ് ഭീകരർക്കെതിരെയുള്ള വെടിനിർത്തൽ കരാറിന് അംഗീകാരം നൽകി ഇസ്രായേൽ മന്ത്രിസഭ. ബന്ദികളാക്കപ്പെട്ടവരിൽ 50 പേരെ മോചിപ്പിക്കാമെന്ന കരാറിന്റെ അടിസ്ഥാനത്തിലാണ് താൽകാലിക വെടിനിർത്തൽ ഇസ്രായേൽ നടപ്പിലാക്കുന്നത്. വോട്ടെടുപ്പിലൂടെയാണ് കരാറിന് ഇസ്രായേൽ സർക്കാർ പിന്തുണ പ്രഖ്യാപിച്ചത്. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവാണ് മദ്ധ്യസ്ഥകരാർ അംഗീകരിക്കുന്നതായി വ്യക്തമാക്കിയത്.

ഇസ്രായേൽ – ഹമാസ് പോരാട്ടം ശക്തമായ സാഹചര്യത്തിൽ ഖത്തറിന്റെയും അമേരിക്കയുടെയും നേതൃത്വത്തിലാണ് മദ്ധ്യസ്ഥ നീക്കങ്ങൾ പുരോഗമിക്കുന്നത്. മദ്ധ്യസ്ഥകരാർ അംഗീകരിക്കുന്നതിൽ ഇസ്രായേൽ മന്ത്രിസഭയിൽ ഭിന്നാഭിപ്രായമാണ് ഉയർന്നുവന്നത്. ഈ സാഹചര്യത്തിലായിരുന്നു വോട്ടിട്ട് പിന്തുണ തേടിയത്. ഗാസയിൽ ബന്ദികളാക്കപ്പെട്ട സ്ത്രീകളെയും കുട്ടികളെയുമാണ് ഹമാസ് ഭീകരർ മോചിപ്പിക്കുക. ഇസ്രായേൽ – ഹമാസ് പോരാട്ടം ആരംഭിച്ചതിന് ശേഷം സംഘർഷം പരിഹരിക്കുന്നതിനായി സ്വീകരിച്ച ആദ്യ നടപടിയാണ് വെടിനിർത്തലിനും ബന്ദികളെ മോചിപ്പിക്കുന്നതിനുമുള്ള മദ്ധ്യസ്ഥ കരാർ.

നാല് ദിവസങ്ങളിലായി ഘട്ടം ഘട്ടമായിട്ടായിരിക്കും ബന്ദികളെ മോചിപ്പിക്കുന്നത്. ഈ നാല് ദിവസങ്ങളിലും ഇസ്രായേലിന്റെ ഭാഗത്ത് നിന്നും യാതൊരു വിധത്തിലുള്ള ആക്രമണങ്ങളും ഉണ്ടാകില്ല. അതേസമയം, മദ്ധ്യസ്ഥകരാർ അംഗീകരിച്ചെങ്കിലും ഹമാസിനെതിരായ പോരാട്ടം അവസാനിപ്പിക്കില്ലെന്ന് ബെഞ്ചമിൻ നെതന്യാഹു വ്യക്തമാക്കി. ഹമാസിനെ ഭൂമിയിൽ നിന്നും ഇല്ലായ്മ ചെയ്യുന്നതുവരെ പോരാട്ടം തുടരുമെന്നും ഇസ്രായേൽ പ്രധാനമന്ത്രി കൂട്ടിച്ചേർത്തു.