ചാന്ദ്രദൗത്യത്തിന് പിന്നിലെ പൗർണ്ണമി ശക്തി! ഐഎസ്ആർഒ ചെയർമാൻ ഡോ സോമനാഥ്, ഞായറാഴ്ച്ച പ്രത്യേക പൂജ നടത്തുന്നതിനായി പൗർണ്ണമിക്കാവ് ദേവി സന്നിധിയിൽ എത്തുന്നു

തിരുവനന്തപുരം: ചന്ദ്രയാൻ 3 വിജയകരമായി ചന്ദ്രന്റെ ദക്ഷിണ ധ്രുവത്തിൽ സേഫ് ലാൻഡിംഗ് നടത്തിയതിന് പ്രത്യേക പൂജ നടത്തുന്നതിനായി ഐഎസ്ആർഒ ചെയർമാൻ ഡോ.സോമനാഥ് മറ്റന്നാൾ (27.8.2023,ഞായർ) വിഴിഞ്ഞം വെങ്ങാനൂർ പൗർണ്ണമിക്കാവ് ശ്രീ ബാലത്രിപുര സുന്ദരീ ദേവീ ക്ഷേത്രത്തിൽ ദർശനം നടത്തും. ചന്ദ്രയാൻ 3 ദൗത്യം തുടങ്ങിയത് മുതൽ അദ്ദേഹം പൗർണ്ണമിക്കാവിൽ എല്ലാ പൗർണ്ണമിക്കും പൂജ നടത്തിയിരുന്നു. ചന്ദ്രയാൻ ചന്ദ്രനിൽ ഇറങ്ങുന്നതിൻ്റെ അവസാന വട്ട നിരീക്ഷണങ്ങൾക്കായി ഇക്കഴിഞ്ഞ ഇരുപതാം തീയതി ബാംഗ്ലൂരിൽ പോകുന്നതിന് മുമ്പായി നട അടച്ചിരുന്നിട്ടും പൗർണ്ണമിക്കാവിൽ വന്ന് പ്രാർത്ഥിച്ചിരുന്നു.

കഴിഞ്ഞ ആഴ്ച നിശ്ചയിച്ചത് പ്രകാരമാണ് മറ്റന്നാൾ (27.8.2023,ഞായർ) രാവിലെ പത്ത് മണിക്ക് പൗർണ്ണമിക്കാവിൽ നട തുറക്കുന്നത്.രാജ്യത്തിനും ലോകത്തിനും അഭിമാനമായ ചന്ദ്രയാൻ്റെ വിജയം ആചരിക്കുന്നതിന് വേണ്ടിയാണ് ക്ഷേത്രം തന്ത്രിയുടേയും മഠാധിപതി സിൻഹാ ഗായത്രി അമ്മയുടേയും അനുവാദത്തോടെ പൗർണ്ണമി അല്ലാതിരുന്നിട്ടും ഇന്ന് നട തുറക്കുന്നത്.രാത്രി ഏഴ് മണിക്ക് ഐഎസ്ആർഒ ചെയർമാൻ ഡോ.സോമനാഥ് പ്രത്യേക പൂജ നടത്തും.എല്ലാ ഭക്തർക്കും പ്രവേശനം ഉണ്ടായിരിക്കും.അതോടൊപ്പം പൗർണ്ണമിക്കാവ് ശ്രീ ബാലത്രിപുര സുന്ദരീ ദേവീ ക്ഷേത്രത്തിലെ ഭാരവാഹികൾ ഇന്ത്യയുടെ അഭിമാനം ചന്ദ്രനോളം എത്തിച്ചതിന് ഡോ.സോമനാഥിനെ ആദരിക്കുകയും ചെയ്യും.