തൃശ്ശൂർ : കേരളത്തിൽ രണ്ട്, എന്നാൽ കേന്ദ്രത്തിൽ എത്തിയാൽ ഒന്ന് എന്നാണ് കോൺഗ്രസ് – സിപിഎം തമ്മിലുള്ള അന്തർധാര. ഇത് പരസ്യമായ രഹസ്യവുമാണ്. ഇപ്പോഴിതാ, ലോക്സഭാ തെരഞ്ഞെടുപ്പിലും കോൺഗ്രസ്-സിപിഎം അന്തർധാര സജീവമായിരിക്കുമെന്ന് സൂചന നൽകിയിരിക്കുകയാണ് ടി.എൻ പ്രതാപൻ എംപി. കോൺഗ്രസിന്റെ സ്ഥാനാർത്ഥികളെ വിജയിപ്പിക്കേണ്ടത് കമ്യൂണിസ്റ്റുകാരുടെ ഉത്തരവാദിത്വമാണെന്നും തൃശ്ശൂരിലെ കമ്യൂണിസ്റ്റുകാർ തനിക്ക് വോട്ട് നൽകി വിജയിപ്പിക്കണമെന്നും ടി.എൻ പ്രതാപൻ പറഞ്ഞു.
യുഡിഎഫും എൽഡിഎഫും തമ്മിലാണ് തൃശ്ശൂരിൽ മത്സരം നടക്കുന്നത്. എന്നാൽ ബിജെപിയാണ് കോൺഗ്രസിന്റെ ഏറ്റവും വലിയ ശത്രു. ദേശീയ തലത്തിൽ കോൺഗ്രസും സിപിഎമ്മും ഒന്നിച്ചാണ്. സംഘപരിവാർ ശക്തികളെ നേരിടുന്നതിന് ഇൻഡി മുന്നണിയാണ് ദേശീയ തലത്തിൽ വരുന്നത്. അതുകൊണ്ടാണ് സിപിഎമ്മും സിപിഐയുമായുമെല്ലാം ഞങ്ങൾക്ക് ധാരണയുള്ളത്. കോൺഗ്രസിന് എംപിമാരുടെ എണ്ണം കൂടുതൽ ഉണ്ടായാൽ മാത്രമാണ് ദേശീയതലത്തിൽ കാര്യമുള്ളൂ. അതിനാൽ തന്നെ, കോൺഗ്രസിന് എംപിമാരെ ഉണ്ടാക്കി തരേണ്ടത് കമ്യൂണിസ്റ്റുകാരുടെ ഉത്തരവാദിത്വമാണെന്ന് ടി എൻ പ്രതാപൻ പറയുന്നു. അതേസമയം, അന്ധമായ കമ്യൂണിസ്റ്റ് വിരോധമുള്ള ആളല്ല ഞാൻ. എന്നാൽ എൽഡിഎഫിന് എംപിമാർ ഉണ്ടായിട്ട് ദേശീയ തലത്തിൽ കാര്യമില്ല. കോൺഗ്രസിനാണ് എംപിമാരെ ആവശ്യം. അതുകൊണ്ട് ബിജെപി കേന്ദ്രത്തിൽ വരരുതെന്ന് ആഗ്രഹിക്കുന്ന കമ്യൂണിസ്റ്റുകാരെല്ലാം തനിക്ക് വോട്ട് ചെയ്യണമെന്നും ടി.എൻ പ്രതാപൻ വ്യക്തമാക്കി.
