“സെക്രട്ടറി മാറിയിട്ട് കാര്യമില്ല, പാർട്ടിയിൽ നടക്കുന്നത് ഏകാധിപത്യം”; പൊട്ടിത്തെറിച്ച് വി. കുഞ്ഞികൃഷ്ണൻ

പയ്യന്നൂർ: നിയമസഭാ തിരഞ്ഞെടുപ്പിലെ കനത്ത പരാജയത്തിന് പിന്നാലെ സിപിഎം നേതൃത്വത്തെ കടന്നാക്രമിച്ച് പയ്യന്നൂരിലെ നിയുക്ത എംഎൽഎ വി. കുഞ്ഞികൃഷ്ണൻ. സംസ്ഥാന സെക്രട്ടറി രാജിവെച്ചതുകൊണ്ട് മാത്രം പാർട്ടിയിൽ മാറ്റമുണ്ടാകില്ലെന്നും കേരളത്തിലെ പാർട്ടിയെ നിയന്ത്രിക്കുന്ന ശക്തികളെക്കുറിച്ചും ചോദ്യം ചെയ്യപ്പെടാത്ത തീരുമാനങ്ങളെക്കുറിച്ചും ഗൗരവമായ പരിശോധന വേണമെന്നും അദ്ദേഹം ആവശ്യപ്പെട്ടു.

ഒരാൾ പ്രഖ്യാപിക്കുന്ന കാര്യങ്ങൾ തീരുമാനമായി അടിച്ചേൽപ്പിക്കുന്ന രീതിയിലേക്ക് കേരളത്തിലെ പാർട്ടി മാറിയിരിക്കുകയാണ്. അഭിപ്രായങ്ങളെ ചോദ്യം ചെയ്യാൻ മറ്റുള്ളവർ തയ്യാറാകാത്തത് എന്തുകൊണ്ടാണെന്ന് പരിശോധിക്കണം. പാർട്ടിക്കകത്ത് ശരിയായ രീതിയിലുള്ള തുറന്നുപറച്ചിലുകളും ചർച്ചകളും അനിവാര്യമാണെന്നും ആ ചർച്ചകളിൽ ഉയരുന്ന അഭിപ്രായങ്ങൾക്കനുസരിച്ചുള്ള തീരുമാനങ്ങളാണ് ഉണ്ടാകേണ്ടതെന്നും കുഞ്ഞികൃഷ്ണൻ പയ്യന്നൂരിൽ പറഞ്ഞു.

തെറ്റ് ചെയ്തവർ ശിക്ഷിക്കപ്പെടുക എന്നത് സാമാന്യ നീതിയാണ്. എന്നാൽ കുറ്റക്കാരെ ശിക്ഷിക്കാതെ സംരക്ഷിക്കുന്ന നിലപാടാണ് പാർട്ടി സ്വീകരിക്കുന്നത്. ഇങ്ങനെയെങ്കിൽ പിന്നെ എങ്ങനെയാണ് തെറ്റ് തിരുത്തുകയെന്നും അദ്ദേഹം ചോദിച്ചു. അനുഭവങ്ങളിൽ നിന്ന് പഠിക്കാനും തിരുത്താനും തയ്യാറായിരുന്ന കമ്മ്യൂണിസ്റ്റ് പാർട്ടിയിൽ കുറച്ചുകാലമായി അത്തരം പ്രവണതകൾ കാണുന്നില്ലെന്ന് അദ്ദേഹം കുറ്റപ്പെടുത്തി.

മുതിർന്ന നേതാക്കളായ ജി. സുധാകരനും ടി.കെ. ഗോവിന്ദനും ഉൾപ്പെടെയുള്ളവർ പാർട്ടി തീരുമാനത്തിനെതിരെ പരസ്യമായി രംഗത്തെത്തുകയും മത്സരിക്കുകയും ചെയ്യുന്ന സാഹചര്യം മുൻപെങ്ങും ഉണ്ടായിട്ടില്ലാത്തതാണ്. ഇത്തരത്തിലുള്ള പൊട്ടിത്തെറികൾ തുടർന്നാൽ കേരളത്തിലെ സിപിഎമ്മും ബംഗാളിന്റെ അവസ്ഥയിലേക്ക് എത്തിച്ചേരും. ഈ മുന്നറിയിപ്പ് തന്റെ പുസ്തകത്തിൽ നേരത്തെ നൽകിയിട്ടുള്ളതാണെന്നും വി. കുഞ്ഞികൃഷ്ണൻ ഓർമ്മിപ്പിച്ചു. തിരുത്താൻ പാർട്ടി എത്രത്തോളം തയ്യാറാകുന്നോ അത്രത്തോളം നല്ലതെന്നും അദ്ദേഹം കൂട്ടിച്ചേർത്തു.