മുഖം മറച്ച് ബൈക്കിലെത്തി മൊബൈലും മാലയും തട്ടിപ്പറിക്കുന്നത് പതിവ്; പരാതികൾ ഉയർന്നിട്ടും കള്ളന്മാരെ പിടികൂടാനാവാതെ പോലീസ്; ‘അന്വേഷിക്കുന്നുണ്ട്’ എന്ന പല്ലവി തുടർന്ന് ഏമാന്മാർ!

കാസര്‍കോട്:ജില്ലയിൽ മോഷണ കേസുകൾ വർദ്ധിക്കുന്നു. കഴിഞ്ഞ ദിവസം കാസര്‍കോട് മേല്‍പ്പറമ്പില്‍ മുഖം മറച്ച് ബൈക്കിലെത്തിയ യുവാവ് യുവതിയുടെ മാല പൊട്ടിച്ച് കടന്നു കളഞ്ഞു. ചെമ്മനാട് ചാമക്കടവിലെ സെല്‍വിയുടെ മാലയാണ് പൊട്ടിച്ചത്. റോഡരികിലൂടെ നടന്ന് പോകുമ്പോഴായിരുന്നു മാല തട്ടിപ്പറിച്ചത്.

ബൈക്കിലെത്തിയ സംഘം യുവതിയുടെ കൈയില്‍ നിന്ന് മൊബൈല്‍ ഫോണ്‍ തട്ടിപ്പറിച്ച് രക്ഷപ്പെട്ട സംഭവവും ജില്ലയിൽ നടന്നിരുന്നു. ഫോണില്‍ സംസാരിച്ച് നടന്ന് പോകുന്നതിനിടെ ബേക്കല്‍ പോലീസ് സ്റ്റേഷൻ പരിസരത്ത് വച്ചായിരുന്നു ബൈക്കിലെത്തിയ സംഘം മൊബെെൽ തട്ടിപ്പറിച്ചത്. രണ്ട് സംഭവങ്ങളിലും പോലീസ് കേസെടുത്ത് അന്വേഷണം ആരംഭിച്ചു. എന്നാൽ ഇതുവരെ പ്രതികളെ പിടികൂടാൻ സാധിച്ചിട്ടില്ല. വ്യാജ നമ്പര്‍ പ്ലേറ്റുകള്‍ ഘടിപ്പിച്ച ഇരുചക്രവാഹനങ്ങളിലാണ് സംഘങ്ങള്‍ എത്തുന്നത്. ഹെല്‍മെറ്റ് ഉപയോഗിച്ച് മുഖം മറക്കുക കൂടി ചെയ്യുന്നതോടെ പ്രതികളെ തിരിച്ചറിയാന്‍ സാധിക്കാതെ പോവുകയാണെന്നും പോലീസ് പറഞ്ഞു.