‘ജനനായകൻ’ വമ്പൻ പ്രതിസന്ധിയിൽ; 120 കോടിയുടെ ഒടിടി കരാറിൽ നിന്ന് ആമസോൺ പിന്മാറുന്നതായി റിപ്പോർട്ട്

ചെന്നൈ: വിജയ് ആരാധകർ ഏറെ ആവേശത്തോടെ കാത്തിരിക്കുന്ന പൊളിറ്റിക്കൽ ത്രില്ലർ ചിത്രം ‘ജനനായകൻ’ വലിയ പ്രതിസന്ധിയിലേക്കെന്ന് റിപ്പോർട്ടുകൾ. ചിത്രത്തിന്റെ ഒടിടി അവകാശത്തിനായി ഒപ്പിട്ട 120 കോടി രൂപയുടെ റെക്കോർഡ് കരാറിൽ നിന്ന് പ്രമുഖ സ്ട്രീമിംഗ് പ്ലാറ്റ്‌ഫോമായ ആമസോൺ പ്രൈം വീഡിയോ പിന്മാറാൻ ഒരുങ്ങുന്നതായാണ് വിവരം. സെൻസർ ബോർഡുമായുള്ള നീണ്ടുനിൽക്കുന്ന തർക്കങ്ങൾ കാരണം സിനിമയുടെ റിലീസ് അനിശ്ചിതമായി നീളുന്നതാണ് ആമസോണിനെ ഇത്തരമൊരു കടുത്ത തീരുമാനത്തിലേക്ക് പ്രേരിപ്പിക്കുന്നത്. സിനിമ കൃത്യസമയത്ത് കൈമാറുന്നതിൽ നിർമ്മാതാക്കൾ പരാജയപ്പെട്ടത് കരാർ ലംഘനമായി കമ്പനി ചൂണ്ടിക്കാട്ടുന്നു.

സെൻസർ സർട്ടിഫിക്കറ്റ് ലഭിക്കുന്നതുമായി ബന്ധപ്പെട്ട തടസ്സങ്ങളാണ് സിനിമയെ കുഴപ്പത്തിലാക്കിയിരിക്കുന്നത്. 2025 ഡിസംബറിൽ പ്രാഥമിക പരിശോധന പൂർത്തിയാക്കിയ ചിത്രത്തിനെതിരെ ഒരു കമ്മിറ്റി അംഗം ഉന്നയിച്ച മതപരമായ പരാമർശങ്ങളും സൈനിക ചിഹ്നങ്ങളുമാണ് വിനയായത്. ഇതേത്തുടർന്ന് സിബിഎഫ്സി ചെയർമാൻ ചിത്രം റിവൈസിംഗ് കമ്മിറ്റിയുടെ (RC) പുനഃപരിശോധനയ്ക്ക് വിട്ടു. ഇതിനെതിരെ നിർമ്മാതാക്കൾ മദ്രാസ് ഹൈക്കോടതിയെ സമീപിച്ചെങ്കിലും പിന്നീട് വേഗത്തിലുള്ള പരിഹാരത്തിനായി ഹർജി പിൻവലിച്ച് റിവൈസിംഗ് കമ്മിറ്റിയുടെ തീരുമാനത്തിന് കാത്തിരിക്കാൻ തീരുമാനിക്കുകയായിരുന്നു. എന്നാൽ കഴിഞ്ഞ മാർച്ച് 9-ന് നിശ്ചയിച്ചിരുന്ന സ്ക്രീനിംഗ് പ്രധാന കമ്മിറ്റി അംഗത്തിന്റെ ആരോഗ്യപ്രശ്നങ്ങൾ കാരണം അവസാന നിമിഷം റദ്ദാക്കിയത് വീണ്ടും തിരിച്ചടിയായി.

മാർച്ച് 17-ന് പുതിയ സ്ക്രീനിംഗ് നടക്കുമെന്ന് സൂചനകളുണ്ടെങ്കിലും ഔദ്യോഗികമായി സർട്ടിഫിക്കറ്റ് ലഭിക്കാത്ത സാഹചര്യത്തിൽ റിലീസ് തീയതി പ്രഖ്യാപിക്കാൻ കെവിഎൻ പ്രൊഡക്ഷൻസിന് സാധിക്കുന്നില്ല. ജനുവരിയിൽ തിയേറ്ററുകളിൽ എത്തേണ്ടിയിരുന്ന ചിത്രം ഇപ്പോൾ മെയ് അല്ലെങ്കിൽ ജൂൺ മാസങ്ങളിലാകും റിലീസ് ചെയ്യുക എന്നാണ് സിനിമാ വൃത്തങ്ങൾ നൽകുന്ന വിവരം. ജൂൺ 22-ന് വിജയ്‌യുടെ ജന്മദിനത്തോടനുബന്ധിച്ച് ചിത്രം എത്തിക്കാനാണ് നിലവിലെ ശ്രമം. എച്ച്. വിനോദ് സംവിധാനം ചെയ്യുന്ന ഈ ചിത്രം തമിഴ് സിനിമയിലെ തന്നെ ഏറ്റവും വലിയ ബിസിനസ് പ്രതീക്ഷയുള്ള പ്രോജക്റ്റുകളിൽ ഒന്നാണ്. ആമസോൺ കരാറിൽ നിന്ന് പിന്മാറിയാൽ അത് നിർമ്മാതാക്കൾക്ക് വലിയ സാമ്പത്തിക നഷ്ടമുണ്ടാക്കുമെന്നതിനാൽ സെൻസർ ബോർഡിന്റെ അന്തിമ തീരുമാനത്തിനായി ആകാംക്ഷയോടെ കാത്തിരിക്കുകയാണ് സിനിമാ ലോകം.