ബംഗ്ലാദേശിൽ വീണ്ടും തലപൊക്കി ജിഹാദികൾ!! ഷെയ്ഖ് ഹസീനയുടെ വാർത്താസമ്മേളനത്തിന് പിന്നാലെ ഷാക്കിബ് അൽ ഹസന്റെ വീടിന് നേരെ പെട്രോൾ ബോംബേറ്

ധാക്ക : ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന ദില്ലിയിൽ നടത്തിയ വിർച്വൽ വാർത്താസമ്മേളനത്തിൽ പങ്കെടുത്തതിന് തൊട്ടുപിന്നാലെ, മുൻ ക്രിക്കറ്റ് ടീം ക്യാപ്റ്റനും അവാമി ലീഗ് മുൻ എംപിയുമായ ഷാക്കിബ് അൽ ഹസന്റെ തറവാട്ടു വീടിന് നേരെ പെട്രോൾ ബോംബ് ആക്രമണം. ബംഗ്ലാദേശിലെ മഗുറ നഗരത്തിലെ കേശബ്മോറിലുള്ള വീടിന് നേരെയാണ് ആക്രമണമുണ്ടായത്. ആക്രമണത്തിൽ വീടിന് കേടുപാടുകൾ സംഭവിച്ചിട്ടുണ്ട്.

ദില്ലിയിലെ ഫോറിൻ കറസ്‌പോണ്ടന്റ്‌സ് ക്ലബ്ബിൽ ഷെയ്ഖ് ഹസീന പങ്കെടുത്ത വാർത്താസമ്മേളനത്തിൽ ഷാക്കിബും ഓൺലൈനായി പങ്കെടുത്തിരുന്നു. ഇതിന് പിന്നാലെയാണ് അക്രമികൾ തറവാട്ടു വീടിന് നേരെ പെട്രോൾ ബോംബെറിയുകയും വീട് തകർക്കുകയും ചെയ്തത്. രാഷ്ട്രീയ പ്രതികാരത്തിന്റെ ഭാഗമായാണ് ആക്രമണമെന്ന് അവാമി ലീഗ് ആരോപിച്ചു.

വരുന്ന ഡിസംബറിൽ താൻ ബംഗ്ലാദേശിലേക്ക് മടങ്ങിയെത്തുമെന്നും, ജയിൽവാസത്തെയും മരണത്തെയും ഭയക്കുന്നില്ലെന്നും വാർത്താസമ്മേളനത്തിൽ ഷെയ്ഖ് ഹസീന വ്യക്തമാക്കിയിരുന്നു. ബംഗ്ലാദേശിൽ ജനാധിപത്യവും മതേതരത്വവും തിരികെ കൊണ്ടുവരാനാണ് താൻ ആഗ്രഹിക്കുന്നതെന്നും അവർ കൂട്ടിച്ചേർത്തു. എന്നാൽ, ഇതിന് പിന്നാലെയുണ്ടായ ഈ അക്രമ സംഭവം രാജ്യത്തെ നിലവിലെ രാഷ്ട്രീയ അന്തരീക്ഷം വീണ്ടും കലുഷിതമാക്കിയിരിക്കുകയാണ്.