ജിഷ്ണു രാഘവന്റെ ഓർമകൾക്ക് ഇന്നേക്ക് ഏഴ് വർഷം;ഇന്നും നൊമ്പരമായി ജിഷ്ണുവിന്റെ വിയോഗം

സൗമ്യതയുള്ള മുഖവും നിറപുഞ്ചിരിമായി പ്രേക്ഷകരുടെ മനംകവർന്ന നടൻ ജിഷ്ണു രാഘവന്റെ ഓർമ്മകൾക്ക് ഇന്ന് ഏഴ് വർഷം. നമ്മൾ എന്ന സിനിമയിലൂടെയാണ് മലയാളികളുടെ മനസിലേക്ക് ജിഷ്ണു രാഘവൻ ചേക്കേറുന്നത്. 2014 മുതൽ ക്യാൻസർ രോഗത്തിന് ചികിത്സയിലായിരുന്ന ജിഷ്ണു 2016 ല്‍ ആണ് കാന്‍സറിനോട് പൊരുതി മരണത്തിന് കീഴടങ്ങിയത്.

രോഗം തന്നെ കാര്‍ന്ന് തിന്നുമ്പോഴും അസാമാന്യമായ ധൈര്യവും ആത്മവിശ്വാസവുമാണ് ജിഷ്ണു പ്രകടിപ്പിച്ചിരുന്നത്. താന്‍ ക്യാന്‍സര്‍ ബാധിതനാണെന്ന് ജിഷ്ണു തന്നെയായിരുന്നു ഫേസ്ബുക്കിലൂടെ തുറന്ന് പറഞ്ഞതും. മാത്രമല്ല രോഗകാലത്തെ ചിത്രങ്ങളും ജിഷ്ണു ഫേസ്ബുക്കിൽ പങ്കുവച്ചിരുന്നു. ഇതിലൂടെ രോഗം ബാധിച്ച പലര്‍ക്കും ധൈര്യവും ആത്മവിശ്വാസവും പകർന്നേക്കാൻ ജിഷ്ണുവിന് സാധിച്ചു.