കാര്യവട്ടത്തെ ഗ്രീൻ ഫീൽഡ് സ്റ്റേഡിയത്തിൽ വച്ച് നടക്കാൻ പോകുന്ന ഏകദിന മത്സരം പണമുള്ളവർ കണ്ടാൽ മതിയെന്ന കായിക മന്ത്രി അബ്ദുറഹിമാന്റെ പ്രസ്താവന കായികപ്രേമികളെ അവഹേളിക്കുന്നതെന്ന് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. ഇന്ത്യ-ശ്രീലങ്ക ഏകദിന ക്രിക്കറ്റിൻ്റെ വിനോദനികുതി 5 ശതമാനത്തിൽ നിന്നും 20 ശതമാനമായാണ് സർക്കാർ കൂട്ടിയത്. ഈ നടപടി പിൻവലിക്കണമെന്ന് കെ സുരേന്ദ്രൻ ആവശ്യപ്പെട്ടു.
പണമുള്ളവർക്ക് മാത്രം പങ്കെടുക്കാൻ ഇത് ഐപിഎൽ ലേലമല്ലെന്നും , ക്രിക്കറ്റ് മത്സരമാണെന്ന് മന്ത്രി ഓർക്കണമെന്നും അദ്ദേഹം വ്യക്തമാക്കി. മന്ത്രി നടത്തിയ പരാമർശം പിൻവലിച്ച് മാപ്പ് പറയാനും നികുതി കുറയ്ക്കാനും അദ്ദേഹം ആവശ്യപ്പെട്ടു.. .കുത്തക മുതലാളിമാർക്ക് ഇളവുകൾ നൽകുന്ന സർക്കാർ പാവപ്പെട്ടവരുടെ മേൽ നികുതി ഭാരം കെട്ടിവെക്കുകയാണെന്നും എങ്ങനെയും ജനങ്ങളെ കൊള്ളയടിക്കുകയാണ് സർക്കാരിന്റെ ലക്ഷ്യമെന്നും അദ്ദേഹം പറഞ്ഞു.
