കേന്ദ്രസർക്കാർ പണം നൽകുന്നില്ലെന്നാവർത്തിച്ച് കേരളം; രേഖകൾ ഹാജരാക്കാതെ എങ്ങനെയാണ് പണം ലഭിക്കുകയെന്ന് കേന്ദ്ര ധനമന്ത്രി നിർമലാ സീതാരാമൻ

ദില്ലി : കേന്ദ്രസർക്കാർ കൃത്യ സമയത്തിന് പണം നൽകുന്നില്ലെന്ന കേരളത്തിന്റെ പരാതിയിൽ, ആഞ്ഞടിച്ച് കേന്ദ്ര ധനമന്ത്രി നിർമലാ സീതാരാമൻ രംഗത്തു വന്നു. കേരളം കൃത്യസമയത്ത് രേഖകൾ ഹാജരാക്കാറില്ലെന്ന് ധനമന്ത്രി ആരോപിച്ചു . ജിഎസ്ടി നഷ്ടപരിഹാരം ലഭിക്കാൻ എജി സാക്ഷ്യപ്പെടുത്തിയ രേഖകൾ സംസ്ഥാനങ്ങൾ സമർപ്പിക്കണം എന്ന നിർദേശമുണ്ടെങ്കിലും കേരളം രേഖകൾ സമർപ്പിക്കാറില്ല. 2017 മുതൽ കേരളം ഗുരുതരമായ സമാന വീഴ്ച തുടരുകയാണെന്നും നിർമല സീതാരാമൻ പറഞ്ഞു.

ജിഎസ്ടി നഷ്ടപരിഹാരമായി 5,000 കോടിയോളം രൂപ ലഭിക്കാനുണ്ടെന്നാണ് സംസ്ഥാന സർക്കാർ അവകാശപ്പെട്ടിരുന്നത്. സംസ്ഥാന ബഡ്ജറ്റിലെ നികുതി വർദ്ധനവിന് വിശദീകരണമായി ഇതും ഉയർത്തി കാട്ടിയിരുന്നു.തുടർന്ന് നിജസ്ഥിതി എന്താണെന്ന് എൻ.കെ.പ്രേമചന്ദ്രൻ എംപി ലോക്സഭയിൽ ചോദിച്ചിരുന്നു. ഇതിനു മറുപടി പറയുകയായിരുന്നു ധനമന്ത്രി.

ജിഎസ്ടി നഷ്ടപരിഹാരം ലഭിക്കുന്നതിന് കൃത്യമായ വ്യവസ്ഥകളും മാനദണ്ഡങ്ങളുമുണ്ട് . നഷ്ടപരിഹാരം ലഭിക്കാൻ എജി സാക്ഷ്യപ്പെടുത്തിയ രേഖ സമർപ്പിക്കണം. എന്നാൽ, 2017 മുതൽ കേരളം രേഖ നൽകാറില്ല. സംസ്ഥാന സർക്കാരിന്റെ വീഴ്ച മറച്ചുവയ്ക്കുകയും അതിനു കേന്ദ്ര സർക്കാരിനെ കുറ്റപ്പെടുത്തുകയുമാണ്. അടിസ്ഥാനരഹിതമായ ആരോപണങ്ങൾ പറയുമ്പോൾ അതിന് എങ്ങനെയാണ് കേന്ദ്രസർക്കാരിന് മറുപടി നൽകാനാകുകയെന്നും ധനമന്ത്രി തുറന്നടിച്ചു. 15–ാം ധനകാര്യ കമ്മിഷന്റെ ശുപാർശ പ്രകാരം കേരളത്തിന് ലഭിക്കേണ്ട വിഹിതം എല്ലാ സംസ്ഥാനങ്ങൾക്കും നൽകുന്നതുപോലെ വർഷാവർഷം കൃത്യമായി നൽകുന്നുണ്ടെന്നും മന്ത്രി പറഞ്ഞു.