പൊതുജനങ്ങളെ ശാന്തരാകുവിൻ… കോട്ടയം പാസ്പോര്‍ട്ട് സേവാകേന്ദ്രം അടച്ചത് താല്‍ക്കാലികമായി; കെട്ടിടത്തിന്റെ അറ്റകുറ്റപ്പണികൾക്ക് ശേഷംപ്രവർത്തനം പുനരാരംഭിക്കുമെന്ന് വിദേശകാര്യ മന്ത്രാലയം

കോട്ടയം : കോട്ടയത്തെ പാസ്പോര്‍ട്ട് സേവാകേന്ദ്രം അടച്ചത് താല്‍ക്കാലികമായി മാത്രമാണെന്ന് വിദേശകാര്യ മന്ത്രാലയം വ്യക്തമാക്കി. സേവന കേന്ദ്രം പ്രവർത്തിക്കുന്ന കെട്ടിടത്തിന്റെ അടിയന്തിര അറ്റകുറ്റപ്പണികൾക്ക് വേണ്ടിയാണു അടച്ചതെന്നും പൊതുജനങ്ങൾക്ക് സേവനങ്ങള്‍ കൊച്ചി മേഖലയ്ക്കു കീഴിലുള്ള മറ്റു കേന്ദ്രങ്ങളില്‍ ലഭ്യമാവുന്നതിന് വേണ്ട നടപടികൾ സ്വീകരിച്ചിട്ടുണ്ടെന്നും വിദേശകാര്യ മന്ത്രാലയം അറിയിച്ചു. അറ്റകുറ്റപ്പണികൾക്ക് ശേഷം സേവാകേന്ദ്രം വീണ്ടും പ്രവർത്തനം പുനരാരംഭിക്കും.

പത്തനംതിട്ട, ഇടുക്കി, കോട്ടയം ജില്ലകളിൽനിന്നുള്ള ആളുകൾ ആശ്രയിക്കുന്ന പാസ്പോർട്ട് സേവാ കേന്ദ്രം മാറ്റുന്നതിനുള്ള ശ്രമമാണു നടക്കുന്നതെന്നാരോപിച്ച് സിപിഎമ്മും യുഡിഎഫും രംഗത്തു വന്നിരുന്നു.കെട്ടിടം കുലുങ്ങുന്നതു പതിവായതിനെ തുടർന്നു കറുകച്ചാൽ സ്വദേശി നൽകിയ പരാതിയിലാണു താൽക്കാലികമായി അടച്ചിടാനുള്ള തീരുമാനം. ചില സാങ്കേതിക കാരണങ്ങളാൽ ഇന്നുമുതൽ കോട്ടയത്തെ പാസ്പോർട്ട് സേവാ കേന്ദ്രം അടച്ചിടുമെന്നും സേവനങ്ങൾക്കായി ആലപ്പുഴയിലോ തൃപ്പൂണിത്തുറയിലോ ഉള്ള പാസ്പോർട്ട് സേവാ കേന്ദ്രങ്ങളെ ആശ്രയിക്കാമെന്നും മാത്രമാണ് റീജനൽ പാസ്പോർട്ട് ഓഫിസർ ഇന്നലെ അറിയിച്ചിരുന്നത്.

പ്രവർത്തി ദിവസമായിരുന്ന തിങ്കളാഴ്ച 300ൽ അധികം ആളുകൾ കെട്ടിടത്തിലുണ്ടായിരുന്നപ്പോൾ കെട്ടിടം കുലുങ്ങിയതിനെ തുടർന്ന് ആളുകൾ പുറത്തേക്കിറങ്ങി ഓടിയിരുന്നു. കെട്ടിടം കുലുങ്ങുന്നത് പതിവാണ് എന്ന് ജീവനക്കാർ സാക്ഷ്യപ്പെടുത്തുന്നു.