കോഴിക്കോട് ഭീകരാക്രമണത്തിലെ പ്രതി ഷാരൂഖ് സെയ്ഫിയുമായി ഇന്നും തെളിവെടുപ്പ്;പ്രതിയുമായി അന്വേഷണ സംഘം ഷൊർണ്ണൂരിലേക്ക്

കോഴിക്കോട്: കോഴിക്കോട് ഭീകരാക്രമണത്തിലെ പ്രതി ഷാരൂഖ് സെയ്ഫിയുമായി ഇന്ന് അന്വേഷണസംഘം വീണ്ടും തെളിവെടുപ്പ് നടത്തും. ഷൊർണ്ണൂരിലായിരിക്കും ആദ്യ തെളിവെടുപ്പ് നടക്കുക. ആക്രമണം നടന്ന ഡി1, ഡി2 കോച്ചുകളിൽ ഇന്നലെ പ്രതിയുമായി അന്വേഷണസംഘം തെളിവെടുപ്പ് നടത്തിയിരുന്നു.

ആക്രമണം നടത്തിയ എലത്തൂരിൽ ഇനി തെളിവെടുപ്പ് നടത്തേണ്ടതുണ്ട്. അതുപോലെ ഷാരൂഖ് സെയ്ഫി 14 മണിക്കൂറോളം തങ്ങുകയും പെട്രോൾ വാങ്ങുകയും ചെയ്ത ഷൊർണൂരിലും ഇനി തെളിവെടുപ്പ് നടത്തേണ്ടതുണ്ട്. കേരളത്തിലെ തെളിവെടുപ്പ് ഇന്ന് തന്നെ പൂർത്തിയാക്കാനാണ് അന്വേഷണ സംഘത്തിന്റെ ലക്ഷ്യം. അതേസമയം പ്രതിയുടെ റിമാന്‍ഡ് റിപ്പോര്‍ട്ടിലെ കൂടുതല്‍ വിവരങ്ങള്‍ പുറത്തുവന്നിട്ടുണ്ട്. റിമാന്‍ഡ് റിപ്പോര്‍ട്ടില്‍ പ്രതിക്ക് തീവ്രവാദബന്ധമുണ്ടോ എന്നതടക്കമുള്ള വിഷയങ്ങള്‍ അന്വേഷിക്കേണ്ടതുണ്ട് എന്നാണ് പൊലീസ് പറയുന്നത്.