കെഎസ്ഇബി സമരക്കാരുമായി ചർച്ചയ്ക്കില്ല; ചെയർമാനുമായി ചർച്ച നടത്തി മന്ത്രി

തിരുവനന്തപുരം: കെ എസ് ഇ ബി ചെയർമാനെതിരെ സമരം ചെയ്യുന്ന ഓഫീസേഴ്സ് അസോസിയേഷനുമായി ചർച്ചയ്ക്കില്ലെന്ന് വൈദ്യുതി മന്ത്രി കെ.കൃഷ്ണൻകുട്ടി. സമരക്കാരുമായി ചർച്ച നടത്തേണ്ടത് ബോർഡാണ്. അവർക്ക് അതിനുള്ള നിർദേശം നൽകിയിട്ടുണ്ടെന്നും മന്ത്രി കെ കൃഷ്ണൻകുട്ടി പറഞ്ഞു.

സമരം ചെയ്യുന്ന സംഘടനാ നേതാക്കളുമായി മന്ത്രി ഇന്ന് ചർച്ച നടത്തുമെന്നാണ് ആദ്യം കരുതിയത്.
എന്നാൽ മന്ത്രി കെ കൃഷ്ണൻകുട്ടി കെ എസ് ഇ ബി ചെയർമാൻ ബി അശോകുമായി ചർച്ച നടത്തുകയും ചെയ്തു.
വൈദ്യുതി ഭവന് മുന്നില്‍ ഓഫീസേഴ്സ് അസോസിയേഷന്‍റെ ആഭിമുഖ്യത്തില്‍ അനിശ്ചിതകാല സത്യാഗ്രഹവും നിസ്സഹരണ സമരവും തുടരുകയാണ്.

ഈ സാഹചര്യത്തിലാണ് സമരം അവസാനിപ്പിക്കുവാനുള്ള ചർച്ച നടത്താൻ തീരുമാനിച്ചത്. സംഘടന ഭാരവാഹികളുടെ സസ്പെന്‍ഷന്‍ പിന്‍വിലക്കുക, ചെയർമാന്‍റെ ഏകാധിപത്യ നടപടികള്‍ അവസാനിപ്പിക്കുക തുടങ്ങിയ ആവശ്യങ്ങളാണ് സമരക്കാർക്കുള്ളത്.

എന്നാല്‍ ചെയര്‍മാനെ മാറ്റണമെന്ന ആവശ്യം ആരും ഉന്നയിച്ചിട്ടില്ലെന്ന് വൈദ്യുതി മന്ത്രി ഇതിനകം വ്യക്തമാക്കിയിട്ടുണ്ട്. ഇന്ന് നടത്തുന്ന ചര്‍ച്ചയില്‍ സമരം ഒത്തുതീർപ്പാക്കാനുള്ള സാധ്യതയുണ്ടെന്നാണ് സൂചന. ചെയര്‍മാന്‍റെ സമീപനം തിരുത്തിയില്ലെങ്കില്‍ സമരത്തിലേക്ക് നീങ്ങേണ്ടി വരുമെന്ന മുന്നറിയിപ്പും ഓഫീസേഴ്സ് അസോസിയേഷന്‍ നല്‍കിയിട്ടുണ്ട്.