ജന്തർ മന്തറിലെ ലാത്തിച്ചാർജ്! പെൺകുട്ടി മരിച്ചെന്ന പ്രചാരണം വ്യാജം; ആരോഗ്യനില തൃപ്തികരം എന്ന് ദില്ലി പോലീസ്

ദില്ലി : ജന്തർ മന്തറിലെ പ്രതിഷേധ പ്രകടനത്തിനിടെയുണ്ടായ തിരക്കിലും ലാത്തിച്ചാർജിലും പരിക്കേറ്റ 21 കാരിയുടെ ആരോഗ്യനില തൃപ്തികരമാണെന്നും കുട്ടി അപകടനില തരണം ചെയ്തതായും ദില്ലി പോലീസ് അറിയിച്ചു. പെൺകുട്ടി മരണപ്പെട്ടുവെന്ന രീതിയിൽ സോഷ്യൽ മീഡിയയിൽ പ്രചരിക്കുന്ന വാർത്തകൾ പൂർണ്ണമായും തെറ്റാണെന്നും ജനങ്ങളിൽ പരിഭ്രാന്തിയും പോലീസ് വിരുദ്ധ വികാരവും ഉണ്ടാക്കാൻ ലക്ഷ്യമിട്ടുള്ള വ്യാജ പ്രചാരണമാണിതെന്നും പോലീസ് വ്യക്തമാക്കി.

ജൂലൈ 20 തിങ്കളാഴ്ചയാണ് സംഭവം നടന്നത്. ഗുരുതരമായി പരിക്കേറ്റ പെൺകുട്ടിയെ ദില്ലിയിലെ ഡോ. റാം മനോഹർ ലോഹ്യ ആശുപത്രിയിൽ പ്രവേശിപ്പിക്കുകയായിരുന്നു. തുടർന്ന് വെന്റിലേറ്റർ സഹായത്തോടെയാണ് ജീവൻ നിലനിർത്തിയിരുന്നത്. എന്നാൽ പെൺകുട്ടിയുടെ ആരോഗ്യനിലയിൽ വേഗത്തിൽ പുരോഗതിയുണ്ടാവുകയും വെന്റിലേറ്റർ സഹായം ഒഴിവാക്കുകയും ചെയ്തു. നിലവിൽ കുട്ടി സ്വയം ശ്വാസമെടുക്കുന്നുണ്ടെന്നും ഡോക്ടർമാരുടെ നിർദേശങ്ങളോട് കൃത്യമായി പ്രതികരിക്കുന്നുണ്ടെന്നും ക്ലിനിക്കൽ റിപ്പോർട്ടുകൾ വ്യക്തമാക്കുന്നു.

പെൺകുട്ടി മരിച്ചെന്ന തരത്തിലുള്ള വ്യാജ വാർത്തകൾ പ്രചരിപ്പിക്കുന്നതിനെതിരെ ദില്ലി പോലീസ് മുന്നറിയിപ്പ് നൽകിയിട്ടുണ്ട്. പൗരന്മാർ സോഷ്യൽ മീഡിയ ഉപയോഗിക്കുമ്പോൾ ജാഗ്രത പാലിക്കണമെന്നും, വസ്‌തുതകൾ ഔദ്യോഗിക മാർഗ്ഗങ്ങളിലൂടെ സ്ഥിരീകരിച്ച ശേഷം മാത്രം വിവരങ്ങൾ പങ്കുവെക്കണമെന്നും പോലീസ് എക്സിലൂടെ അഭ്യർത്ഥിച്ചു. പെൺകുട്ടി നിലവിൽ വിദഗ്ദ്ധ ഡോക്ടർമാരുടെ പാനലിന്റെ നിരീക്ഷണത്തിൽ തുടരുകയാണ്.