ഭാരതത്തിന്റെ ഭാവി ഇന്ധനം എൽഎൻജി; തകരാറുകളുണ്ടെങ്കിൽ ഉൽപ്പന്നങ്ങൾ തിരിച്ചുവിളിക്കണമെന്നും മന്ത്രി ഇവി നിർമ്മാതാക്കളോട് അഭ്യർത്ഥിച്ച് നിതിൻ ഗഡ്കരി

ദില്ലി: ഭാരതത്തിന്റെ ഭാവി ഇന്ധനം ദ്രവീകൃത പ്രകൃതി വാതകം, അതായത് എൽഎൻജി ആണെന്ന് പ്രഖ്യാപിച്ച് കേന്ദ്ര ഗതാഗത മന്ത്രി നിതിൻ ഗഡ്കരി. ശുദ്ധവും മലിനീകരണരഹിതവും ചെലവ് കുറഞ്ഞതുമായ ദ്രാവക ഇന്ധനമാണ് എൽഎൻജി, ഇത് സംഭരിക്കാനും ലോജിസ്റ്റിക് ചെലവ് കുറയ്‌ക്കാനും എളുപ്പമാണെന്നും നൂറ് ശതമാനവും ബയോ എഥനോളിന്റെ സഹായത്തോടെ പ്രവർത്തിയ്‌ക്കുന്ന ഫ്‌ളെക്‌സ് എഞ്ചിനുകൾ മന്ത്രാലയം പ്രോത്സാഹിപ്പിക്കുമെന്നും അദ്ദേഹം കൂട്ടിച്ചേർത്തു.

‘ഇലക്ട്രിക് വാഹനങ്ങൾക്ക് തീപിടിക്കുന്നത് രാജ്യത്തിന്റെ വിവിധ ഭാഗങ്ങളിൽ റിപ്പോർട്ട് ചെയ്യുന്ന സാഹചര്യത്തിൽ മന്ത്രാലയം തീപിടുത്തങ്ങൾ പരിശോധിക്കാൻ ഉന്നതല സമിതിയെ നിയോഗിച്ചിട്ടുണ്ട്. ഉയർന്ന താപനിലയാണ് തീപിടുത്തത്തിന് കാരണം. ബാറ്ററി സെല്ലുകൾ ഉപയോഗിക്കുമ്പോൾ ജാഗ്രത പാലിക്കണം’- ഗഡ്‌കരി പറഞ്ഞു. കൂടാതെ തകരാറുകളുണ്ടെങ്കിൽ ഉൽപ്പന്നങ്ങൾ തിരിച്ചുവിളിക്കണമെന്നും മന്ത്രി ഇവി നിർമ്മാതാക്കളോട് അഭ്യർത്ഥിക്കുകയും. ബാറ്ററി സെല്ലിൽ ചില പ്രശ്‌നങ്ങളുണ്ടെന്ന് മന്ത്രി കൂട്ടിച്ചേർത്തു.

അതേസമയം ശതകോടീശ്വരനായ ഇലോൺ മസ്‌കിന്റെ വാഹന നിർമ്മാണ കമ്പനി ടെസ്ലയെ ഇന്ത്യയിലേക്ക് ഇന്ന് മന്ത്രി സ്വാഗതം ചെയ്തിരുന്നു. എന്നാൽ ചൈനയിൽ നിന്ന് നിർമ്മിച്ച കാറുകൾ ഇന്ത്യയിൽ വിൽപ്പന നടത്താൻ അനുവദിക്കില്ലെന്ന് മന്ത്രി വ്യക്തമാക്കി. ഇന്ത്യയിൽ സാങ്കേതിക വിദ്യയും സ്‌പെയർപാർട്‌സും ലഭ്യമാണെന്നും നല്ല വിപണിയാണെന്നും അദ്ദേഹം പറഞ്ഞിരുന്നു.