ലോക്സഭാ തെരഞ്ഞെടുപ്പ് പടിവാതിൽക്കൽ ! ബിജെപി പാളയത്തിൽ മുന്നൊരുക്കങ്ങൾ തകൃതി! രാജ്യസഭാംഗങ്ങളായ കേന്ദ്രമന്ത്രിമാരും സ്ഥാനാർത്ഥികളാകും; വി.മുരളീധരൻ ആറ്റിങ്ങലിൽ നിന്ന് ജനവിധി തേടിയേക്കും

ദില്ലി : അടുത്തകൊല്ലം നടക്കുന്ന ലോക്സഭാ തിരഞ്ഞെടുപ്പിനുള്ള തയ്യാറെടുപ്പുകൾ ആരംഭിച്ച് ബിജെപി. രാജ്യസഭാംഗങ്ങളായ കേന്ദ്രമന്ത്രിമാർ ലോക്സഭാ തെരഞ്ഞെടുപ്പിൽ മത്സരിക്കും എന്നാണ് ലഭിക്കുന്ന ഏറ്റവും പുതിയ വിവരം. വി.മുരളീധരൻ, നിർമലാ സീതാരാമൻ, എസ്.ജയശങ്കർ, പീയുഷ് ഗോയൽ, ധർമേന്ദ്ര പ്രധാൻ, ഭൂപേന്ദ്ര യാദവ് എന്നിവരും മൻസൂഖ് മാണ്ഡവ്യ, അശ്വിന് വൈഷ്ണവ്, ജ്യോതിരാദിത്യ സിന്ധ്യ എന്നിവരും ലോക്സഭാ തെരഞ്ഞെടുപ്പിൽ ജനവിധി തേടും. നരേന്ദ്രമോദി സർക്കാരിന്റെ 9-ാം വാർഷികത്തിന്റെ ഭാഗമായി കേന്ദ്രമന്ത്രിമാര്‍ക്കു വിവിധ മണ്ഡലങ്ങൾ നൽകിയിരുന്നു. ആ മണ്ഡലങ്ങളിലെ പ്രവർത്തനങ്ങൾ കൂടി വിലയിരുത്തിയാകും ഏതു മണ്ഡലത്തിലാകും മത്സരിപ്പിക്കുക എന്ന കാര്യത്തിൽ തീരുമാനം എടുക്കുക.

ബിജെപി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരുമായും സംസ്ഥാന അദ്ധ്യക്ഷന്മാരുമായും സംസ്ഥാനത്തിന്റെ ചുമതലയുള്ള ജനറൽ സെക്രട്ടറിമാരുമായും ലോക്സഭാ തിരഞ്ഞെടുപ്പ് ചർച്ചകൾ നടക്കുകയാണ്. വിഷയത്തിൽ ബിജെപി ദേശീയ അദ്ധ്യക്ഷൻ ജെ.പി.നദ്ദയുമായി അമിത് ഷാ ചർച്ച നടത്തിയിരുന്നു. മുതിർന്ന മന്ത്രിമാർ, സുപ്രധാന വകുപ്പുകൾ കൈകാര്യം ചെയ്യുന്നവർ, രണ്ടു തവണയില്‍ കൂടുതൽ രാജ്യസഭാംഗമായിട്ടുള്ളവർ എന്നിവരെ തിരഞ്ഞെടുപ്പിൽ മത്സരിപ്പിക്കാനാണു തീരുമാനം.

വി.മുരളീധരൻ തീരുവനന്തപുരത്തോ ആറ്റിങ്ങലിലോ ആകും മത്സരിക്കുക. മുരളീധരൻ ആറ്റിങ്ങലിൽ‍ ജനസമ്പർക്ക പരിപാടികളുടെ ഭാഗമാകുന്നുണ്ട്. ഇതുകൊണ്ടുതന്നെ ആറ്റിങ്ങൽ മണ്ഡലത്തിൽ നിന്ന് അദ്ദേഹം ജനവിധി തേടാനാണ് സാധ്യത. നിർമലാ സീതാരാമനോ എസ്.ജയശങ്കറോ തമിഴ്നാട്ടിൽനിന്ന് മത്സരിച്ചേക്കും. നടനും ബിജെപി ദേശീയ നിർവാഹണ സമിതി അംഗവുമായ ജി. കൃഷ്‌ണകുമാറിനെ തിരുവനന്തപുരം മണ്ഡലത്തിലേക്ക് പാർട്ടി നേതൃത്വം പരിഗണിക്കുന്നുണ്ട് എന്നാണ് വിവരം.