വിഷു ആശംസയിൽ മന്തി കഴിക്കുന്ന ശ്രീകൃഷ്ണൻ !! ചേർത്തലയിലെ മെഹർ മന്തിക്കട ഉടമ അർഷാദ് അറസ്റ്റിൽ !

ആലപ്പുഴ : വിഷു ആശംസകളുടെ ഭാഗമായി പുറത്തിറക്കിയ പരസ്യചിത്രത്തിൽ ശ്രീകൃഷ്ണനെ അപകീർത്തികരമായ രീതിയിൽ ചിത്രീകരിച്ച സംഭവത്തിൽ ഹോട്ടലുടമയെ പോലീസ് അറസ്റ്റ് ചെയ്തു. ചേർത്തലയിലെ ‘മെഹർ മന്തി’ എന്ന ഹോട്ടലിന്റെ ഉടമ അർഷാദിനെയാണ് മതവികാരം വ്രണപ്പെടുത്തിയെന്ന പരാതിയിൽ ചേർത്തല പോലീസ് കസ്റ്റഡിയിലെടുത്തത്. ഹോട്ടലിന്റെ പേരിൽ പുറത്തിറങ്ങിയ ഈ പോസ്റ്റർ സോഷ്യൽ മീഡിയയിൽ വലിയ തോതിലുള്ള പ്രതിഷേധങ്ങൾക്ക് വഴിതെളിച്ചതിന് പിന്നാലെയാണ് നടപടി. ഭഗവാൻ ശ്രീകൃഷ്ണൻ മന്തി കഴിക്കുന്ന രീതിയിലുള്ള ചിത്രം സോഷ്യൽ മീഡിയ വഴി പ്രചരിപ്പിച്ചതാണ് വിവാദത്തിന് കാരണമായത്.

വിഷുക്കണിക്ക് സമാനമായ രീതിയിൽ ശ്രീകൃഷ്ണ വിഗ്രഹത്തിന് മുന്നിൽ കുഴിമന്തി വിളമ്പിയ ചിത്രം ഭക്തരുടെ വിശ്വാസങ്ങളെ അവഹേളിക്കുന്നതാണെന്നാരോപിച്ച് വിവിധ ഹിന്ദു സംഘടനകൾ രംഗത്ത് വന്നിരുന്നു. ഐപിസി സെക്ഷൻ 295 എ (മതവികാരം വ്രണപ്പെടുത്താൻ മനഃപൂർവ്വം ശ്രമിക്കുക) പ്രകാരമാണ് ഉടമയ്‌ക്കെതിരെ കേസെടുത്തിരിക്കുന്നത്. സംഭവത്തിന് പിന്നാലെ ഹോട്ടലിനെതിരെ കടുത്ത വിമർശനങ്ങൾ ഉയർന്നതോടെ ഉടമ വിശദീകരണവുമായി രംഗത്തെത്തി. പോസ്റ്റർ രൂപകൽപ്പന ചെയ്തത് പുറത്തുനിന്നുള്ള ഏജൻസിയാണെന്നും തന്റെ അറിവോ സമ്മതമോ ഇല്ലാതെയാണ് ഇത്തരമൊരു ചിത്രം ഉൾപ്പെടുത്തിയതെന്നുമാണ് അർഷാദിന്റെ വിശദീകരണം.

വിവാദമായ പോസ്റ്റർ ഹോട്ടലിന്റെ ഔദ്യോഗിക സോഷ്യൽ മീഡിയ പേജുകളിലൂടെ പ്രചരിപ്പിച്ചിട്ടില്ലെന്നും പകരം മറ്റൊരു പോസ്റ്ററാണ് തയ്യാറാക്കിയിരുന്നതെന്നും ഉടമ വിഡിയോ സന്ദേശത്തിലൂടെ അറിയിച്ചു. അബദ്ധവശാൽ സംഭവിച്ച പിഴവാണിതെന്നും ആരുടെയും മതവിശ്വാസത്തെ അധിക്ഷേപിക്കാൻ ഉദ്ദേശിച്ചിട്ടില്ലെന്നും വ്യക്തമാക്കിയ അർഷാദ് സംഭവത്തിൽ നിരുപാധികം ഖേദം പ്രകടിപ്പിച്ചു. എന്നാൽ, പരസ്യം തയ്യാറാക്കിയതിലും പ്രചരിച്ചതിലും ഉടമയ്ക്ക് ഉത്തരവാദിത്തമുണ്ടെന്ന നിലപാടിലാണ് പോലീസ്. ക്രമസമാധാന പ്രശ്നങ്ങൾ കണക്കിലെടുത്ത് പ്രദേശത്ത് പോലീസ് നിരീക്ഷണം ശക്തമാക്കിയിട്ടുണ്ട്. കേസുമായി ബന്ധപ്പെട്ട് കൂടുതൽ അന്വേഷണം നടന്നുവരികയാണെന്ന് ചേർത്തല പോലീസ് അറിയിച്ചു.