ശ്രീ പരമേശ്വരന്റെ തൃക്കണ്ണിനെ ഓര്‍മ്മിപ്പിക്കും ഈ ഇലകൾ; അറിയാം കൂവളവും അതിന്റെ ഔഷധ ഗുണങ്ങളെയും

ഭഗവൻ പരമശിവന് ഏറെ പ്രിയപ്പെട്ട വൃക്ഷമാണ് കൂവളം. കൂവളമാല ഭക്തർ ശിവന് ചാർത്തുന്നു. വീടിന്റെ തെക്കോ പടിഞ്ഞാറോ കൂവളം നടുന്നത് നല്ലതാണ്. എഗ്‌ളി മെര്‍മ്മലോസ് എന്നാണ് ശാസ്ത്രീയ നാമം

വീട്ടിൽ കൂവളം ഉണ്ടെങ്കിൽ അനവധി രോഗങ്ങൾക്കുള്ള പ്രതിവിധി ആണ്. സംസ്കൃതത്തിൽ കൂവളം ബില്വ എന്നാണ് അറിയപ്പെടുന്നത്. ബിലമെന്നാൽ പാപം. ശിവന്റെ മൂന്ന് കണ്ണുകൾ പോലെ മൂന്ന് ഇലകളാണിതിന്.

അതുപോലെ പാപത്തെ ഇല്ലാതാക്കുന്ന ബില്വ ശാരീരിക മാനസിക രോഗങ്ങൾ ഉണ്ടാക്കുന്ന കാരണങ്ങളെ വേരോടെ നശിപ്പിക്കും. കൂവളത്തിന്റ കായ ജ്യൂസ് കുടിക്കുന്നതും നല്ലതാണ്.

ലക്ഷ്മീഫല എന്ന പര്യായം കൂവളത്തിനുണ്ട്. ഐശ്വര്യ ദേവതയാണ് ലക്ഷ്മി. ഇത് അറിയുന്നവർ കൂവളം വീട്ടുമുറ്റത്ത് വച്ചുപിടിപ്പിക്കും.

കൂവളം വീട്ടു മുറ്റത്ത് ഉണ്ടെങ്കിൽ ദാരിദ്ര്യം വരില്ലത്രെ. ഏറെ ഔഷധ മൂല്യമുള്ള വൃക്ഷം കൂടിയാണ് കൂവളം. ബലമുള്ള മുള്ളുകള്‍ ഈ വൃക്ഷത്തിന്റെ പ്രത്യേകതയാണ് ദശമൂലങ്ങളിലൊന്നായ ഇത് ദശമൂലാരിഷ്ടം, വില്വാദിഗുളിക,വില്വാദി ലേഹ്യം, വില്വാദികഷായം എന്നിവയിലെ പ്രധാന ചേരുവയാണ്.

വാതത്തിനും, കഫത്തിനും, ഛര്‍ദ്ദിയ്ക്കും, അതിസാരത്തിനും കൂവളം അത്യുത്തമമാണ്. കൂവളത്തിന്റെ ഇല ചതച്ചെടുത്ത നീര് എണ്ണയില്‍ ചേര്‍ത്ത് കാച്ചി ചെവിയില്‍ ഒഴിച്ചാല്‍ ചെവിവേദന, പഴുപ്പ് എന്നിവ മാറി കിട്ടും.

മാത്രമല്ല ശ്വാസനാളത്തിന്റെയും ശ്വാസകോശത്തിന്റെയും പേശികള്‍ക്ക് അയവ് വരുത്തുന്നതിനാല്‍ കൂവള സത്ത് ആസ്മയ്ക്ക് പ്രതിവിധിയായി ഉപയോഗിക്കുന്നുണ്ട്. എന്നും രാവിലെ വെറും വയറ്റില്‍ 7 കൂവളത്തില ചവച്ചരച്ച് കഴിക്കുന്നത് രക്തശുദ്ധിയ്ക്കും ഉദര സംബന്ധമായ അസുഖങ്ങള്‍ക്കും പ്രതിവിധിയാണ്.

ആയുര്‍വേദത്തില്‍ ഔഷധമായി കൂവളത്തിന്റെ ഇല, തൊലി, വേര്, മുതലായ ഭാഗങ്ങള്‍ ഉപയോഗിക്കുന്നു. പ്രമേഹത്തിന് കൂവളത്തിലയുടെ നീര് 12 മുതല്‍ 15 വരെ മില്ലി ലിറ്റര്‍ വെള്ളത്തില്‍ ചേര്‍ത്ത് ഉപയോഗിക്കുന്നത് ഫലപ്രദമാണെന്ന് പറയപ്പെടുന്നു.

കൂവള കായ്ക്കുള്ളിലെ ദ്രാവകം പശയുടെ നിര്‍മ്മാണത്തിനും വാര്‍ണിഷ് ഉണ്ടാക്കുന്നതിനും ഉപയോഗിക്കുന്നു. സിമന്റ് കൂട്ടുകള്‍ക്ക് ബലം നല്‍കുന്നതിനു ഈ ദ്രാവകം ഉത്തമമാണ്.