യുഗാന്ത്യം !! റഷ്യൻ സഖ്യത്തോട് ആദ്യ റൗണ്ടിൽ തോറ്റു; ടെന്നിസ് കരിയർ അവസാനിപ്പിച്ച് ഇന്ത്യൻ ടെന്നീസ് റാണി സാനിയ മിർസ

ദുബായ് : തന്റെ വിരമിക്കൽ ടൂർണമെന്റായ ദുബായ് ഓപ്പൺ ടെന്നിസിൽ ആദ്യ മത്സരത്തിൽത്തന്നെ തോൽവി രുചിച്ച് സാനിയ മിർസയും പങ്കാളി യുഎസിന്റെ മാസിസൺ കീസും പുറത്തായി. വനിതാ ഡബിൾസിൽ റഷ്യൻ സഖ്യമായ വെറോണിക്ക കുഡെർമെറ്റോവ– ല്യുഡ്മില സാംസോനോവയോടാണ് സാനിയയും കീസും നേരിട്ടുള്ള സെറ്റുകൾക്കു പരാജയപ്പെട്ടത് . സ്കോർ 6–4, 6–0.

ദുബായ് ഓപ്പണ്‍ തന്റെ കരിയറിലെ അവസാന ടൂര്ണമെന്റായിരിക്കുമെന്ന് താരം നേരത്തേ പ്രഖ്യാപിച്ചിരുന്നു. ഈ തോൽവിയോടെ 20 വർഷം നീണ്ട സാനിയയുടെ സംഭവബഹുലമായ ടെന്നിസ് കരിയറിനും അവസാനമായി. റഷ്യൻ സഖ്യത്തിനെതിരെ മികച്ച പോരാട്ടം പുറത്തെടുക്കാൻ കഴിയാതെയാണ് താരം തോൽവി സമ്മതിച്ചത്.

ആദ്യ സെറ്റിൽ 4–4 എന്ന നിലയിൽ നിന്നാണ് റഷ്യൻ സഖ്യം 6–4ന് സെറ്റ് നേടിയത്. എന്നാൽ രണ്ടാം സെറ്റിൽ ഒന്ന് പൊരുതി നോക്കുവാനുള്ള അവസരം പോലും നൽകാതെ ഏകപക്ഷീയമായാണ് റഷ്യൻ വനിതാ താരങ്ങൾ പിടിച്ചെടുത്തത്. റഷ്യൻ താരങ്ങളിൽ 25 വയസ്സുകാരിയായ വെറോണിക്ക സിംഗിൾസിൽ ലോക 11–ാം നമ്പരും ഡബിൾസിൽ അഞ്ചാം നമ്പർ താരവുമാണ്. ല്യു‍ഡ്മില ഡബിൾസിൽ ലോക 13–ാം നമ്പര്‍ താരമാണ്.

2003 ൽ പ്രൊഫഷനൽ ടെന്നിസിൽ അരങ്ങേറിയ സാനിയ മിർസ ആറു ഗ്രാൻഡ് സ്‍ലാം നേടിയാണു കരിയർ അവസാനിപ്പിക്കുന്നത്. സ്വിസ് ഇതിഹാസം മാർട്ടിന ഹിംഗിസിനൊപ്പം മൂന്നൂ വട്ടം വനിതാ ഡബിൾസ് കിരീടങ്ങൾ സാനിയ സ്വന്തമാക്കി. മിക്സഡ് ‍ഡബിൾസിൽ മഹേഷ് ഭൂപതിക്കൊപ്പം 2009 ഓസ്ട്രേലിയൻ ഓപ്പണും 2012 ൽ ഫ്രഞ്ച് ഓപ്പണും വിജയിച്ചു. ബ്രൂണോ സോറസിനൊപ്പം യുഎസ് ഓപ്പണും താരം നേടി .