മരിച്ചെന്ന് വ്യാജവാർത്ത: ‘എനിക്ക് അവസരം നഷ്ടപ്പെടുന്നു, വയറ്റത്തടിക്കുന്നതിന് തുല്യം’; മാലാ പാർവതി

സമൂഹ മാധ്യമത്തിൽ മാത്രം വ്യാജ വാർത്തകളിലൂടെ ‘മരിക്കേണ്ടിവരുന്ന’ സെലിബ്രിറ്റികളുടെ എണ്ണം വർധിക്കുകയാണ്. അവസാനം താൻ മരിച്ചില്ലെന്ന് വ്യക്തമാക്കിക്കൊണ്ട് അവർക്ക് രം​ഗത്തുവരേണ്ടതായി വരും. ഇപ്പോൾ മാലാ പാർവതിയാണ് വ്യാജ വാർത്തയ്ക്ക് ഇരയായിരിക്കുന്നത്.

ചില ഓൺലൈൻ സൈറ്റുകളിൽ മരിച്ചെന്ന തരത്തിൽ വാർത്ത വന്നതാണ് താരത്തിന് തലവേദനയാകുന്നത്. ഇങ്ങനെയുള്ള വാർത്തകൾ കാരണം അന്യ ഭാഷകളിൽ നിന്നുള്ളവർ താൻ മരിച്ചു എന്നുള്ള വാർത്ത വിശ്വസിച്ചിരിക്കുകയാണെന്നും അതിനാൽ തനിക്ക് അവസരങ്ങൾ നഷ്ടപ്പെടുകയാണെന്നും വ്യക്തമാക്കി.

നിരവധി ഓൺലൈൻ സൈറ്റുകളിലാണ് മാലാ പാർവതി മരിച്ചതായി വാർത്തകൾ വന്നിരിക്കുന്നത്. ഇതോടെ ഇതിന്റെ സ്ക്രീൻ ഷോട്ട് ഹൈദരാബാദിൽ നിന്നുള്ള കാസ്റ്റിങ് ഏജന്റാണ് താരത്തിന് അയച്ചുകൊടുത്തത്. ഇത്തരത്തിലുള്ള റിപ്പോർട്ടുകൾ വരുന്നത് അവരെ കൂടുതൽ ആശയക്കുഴപ്പത്തിലാക്കുകയാണെന്നും താരം കുറിക്കുന്നു.

നടിയുടെ വാക്കുകൾ ഇങ്ങനെ…

മരിച്ചിട്ടില്ല എന്ന് പറയേണ്ടി വരുന്നത് ഒരു ഗതികേടാണോ തമാശയാണോന്നറിയില്ല.
പക്ഷേ, വർക്ക് നഷ്ടപ്പെടാൻ ഇടയാക്കുന്നത് വയറ്റത്തടിക്കുന്നതിന് തുല്യമാ. വാട്ട്സപ്പിൽ പ്രൊഫൈൽ പിക് മാറിയത് കൊണ്ടാണ്, ഈ കാസ്റ്റിംഗ് ചെയ്യുന്ന പെൺകുട്ടി എന്നെ വിളിച്ചത്. രണ്ട് പരസ്യത്തിൻ്റെ ഓഡിഷൻ മിസ്സായി!