മദ്രസ വിദ്യാർത്ഥിനിയെ എടുത്തെറിഞ്ഞ സംഭവം;പ്രതി സൈക്കോ സിദ്ധിഖ് അറസ്റ്റിൽ

മഞ്ചേശ്വരം: മദ്രസ വിദ്യാർത്ഥിനിയെ എടുത്തെറിഞ്ഞ സംഭവത്തിൽ പ്രതി സൈക്കോ സിദ്ധിഖ് എന്ന് അറിയപ്പെടുന്ന അബൂബക്കർ സിദ്ധിഖ് അറസ്റ്റിൽ. ഇയാൾ രാവിലെ തന്നെ പോലീസ് കസ്റ്റഡിയിലായിരുന്നു എങ്കിലും ഉച്ചയോടെയാണ് അറസ്റ്റ് രേഖപ്പെടുത്തിയത്.ഇയാൾ ഇതിനു മുൻപും മദ്രസ വിദ്യാർത്ഥികളെ ആക്രമിച്ചിട്ടുണ്ടെന്നാണ് ലഭിച്ച വിവരം.

വ്യാഴാഴ്ച ആക്രമണത്തിന് ഇരയായത് ഒൻപത് വയസുള്ള പെൺകുട്ടിയാണ്. മഞ്ചേശ്വരത്തിനടുത്ത് ഉദ്യാവര ജമാഅത്ത് പള്ളിക്ക് സമീപത്ത് വച്ചാണ് സംഭവം. മഞ്ചേശ്വരം കുഞ്ചത്തൂർ സ്വദേശിയാണ് കേസിൽ പ്രതിയായ അബൂബക്കർ സിദ്ധിഖ്.

ആക്രമണത്തെ തുടർന്ന് പരിക്കേറ്റ പെൺകുട്ടിയെ ആശുപത്രിയിൽ പ്രവേശിപ്പിച്ചിരിക്കുകയാണ്. പ്രതിയായ സൈക്കോ സിദ്ധിഖ് യാതൊരു പ്രകോപനവുമില്ലാതെ കുട്ടിയെ ആക്രമിക്കുകയായിരുന്നുവെന്ന് ബന്ധു റാഫി പറഞ്ഞിരുന്നു. കുട്ടിക്ക് ആരോഗ്യപ്രശ്നങ്ങളുണ്ടെന്നും വിദഗ്ദ്ധ ചികിത്സയ്ക്കായി മംഗലാപുരത്തേക്ക് കൊണ്ടുപോകുമെന്നും റാഫി വ്യക്തമാക്കിയതാണ്.