ലഹരിക്കടത്ത് കേസിലെ അട്ടിമറി; ആന്റണി രാജുവിനെതിരായ പുതിയ തെളിവുകൾ പുറത്ത്; പ്രതിയുടെ അടിവസ്ത്രത്തിലെ നൂല് പുതിയതെന്ന് ഫൊറന്‍സിക് റിപ്പോർട്ട്

തിരുവനന്തപുരം: മന്ത്രി ആന്റണി രാജു പ്രതിയായ ലഹരിക്കടത്ത് കേസിൽ പ്രതിയുടെ അടിവസ്ത്രം മാറ്റിവെച്ച് കോടതിയെ കബളപ്പിച്ച സംഭവത്തിൽ കൂടുതൽ വിവരങ്ങൾ പുറത്ത്. ആന്റണി രാജുവിന്റെ കൈവശമുണ്ടായിരുന്ന അടിവസ്ത്രത്തിലെ തുന്നൽ പുതിയതാണെന്നാണ് പുതിയ കണ്ടെത്തൽ. ഫൊറന്‍സിക് റിപ്പോർട്ട് ഫലത്തിലാണ് ഈ നിർണായക വിവരം പുറത്തുവന്നത്.

അടിവസ്ത്രത്തിൽ ക്രമക്കേട് നടന്നുവെന്ന് ശരിവെച്ചതിന്റെ അടിസ്ഥാനത്തിലാണ് ലഹരിക്കേസിലെ പ്രതിയായ ആൻഡ്രൂ സാൽവദോർ സാർവലിയുടെ അഭിഭാഷകനായിരുന്ന ആന്റണി രാജുവിനെതിരേയും കോടതിയിലെ ക്ലർക്കായിരുന്ന ജോസിനെതിരേയും കേസെടുത്തത്. നാല് മാസത്തോളം കാലം തൊണ്ടിമുതലായ അടിവസ്ത്രം സാർവലിയുടെ അഭിഭാഷകനായിരുന്ന ആന്റണി രാജുവിന്റെ കൈവശമായിരുന്നു.

1996 ജൂലൈ 1 ന് ഇത് സംബന്ധിച്ച് റിപ്പോർട്ട് അഡീഷണൽ ചീഫ് ജുഡീഷ്യൽ മജിസ്‌ട്രേറ്റ് കോടതിക്ക് കൈമാറിയിരുന്നു. കീഴ്‌ക്കോടതിയിൽ ഹാജരാക്കിയിരുന്ന പ്രതിയുടെ അടിവസ്ത്രം, ഹൈക്കോടതിയിൽ എത്തിയപ്പോൾ മാറ്റം വന്നിരുന്നുവെന്നാണ് കണ്ടെത്തൽ. അടിവസ്ത്രം വെട്ടിച്ചുരുക്കി തുന്നുകയായിരുന്നു. ഈ നൂലുകളും തുന്നലും തമ്മിൽ വ്യത്യാസമുണ്ടെന്നും അത് അടുത്തിടെ തുന്നി ചേർത്തതാണെന്നും ഫൊറൻസിക് ശരിവെക്കുന്നു. കീഴ്‌ക്കോടതിയിൽ നിന്നും ആന്റണി രാജു കൈപ്പറ്റിയ അടിവസ്ത്രം തിരിച്ച് ഹൈക്കോടതിയിൽ എത്തിയപ്പോൾ മാറ്റം വന്നുവെന്നാണ് കേസ്. അടിവസ്ത്രം വെട്ടിത്തുന്നുകയായിരുന്നു. ഈ നൂലുകളും തുന്നലും തമ്മിൽ വ്യത്യാസമുണ്ടെന്നും ഫൊറെൻസിക് റിപ്പോർട്ട് ശരിവെയ്ക്കുന്നു. ആന്റണി രാജുവിന്റെ കൈവശമുണ്ടായിരുന്ന സമയത്താകാം അടിവസ്ത്രത്തിൽ മാറ്റംവരുത്തിയതെന്നാണ് നിഗമനം.