മധ്യപ്രദേശിൽ മലയാളി ജവാനെ കാണാതായി; പരാതിയുമായി കുടുംബം; തിരച്ചിൽ ആരംഭിച്ച് പോലീസും സൈന്യവും

കൊച്ചി: മലയാളി ജവാനെ കാണാനില്ലെന്ന പരാതിയുമായി കുടുംബം. എറണാകുളം മാമംഗലം സ്വദേശി ക്യാപ്റ്റൻ നിർമ്മൽ ശിവരാജനെയാണ് കാണാതായത്. മദ്ധ്യപ്രദേശിൽ വെച്ചാണ് കാണാതായത്. സംഭവത്തിൽ മദ്ധ്യപ്രദേശ് പോലീസും സൈന്യവും തിരച്ചിൽ ആരംഭിച്ചിട്ടുണ്ട്.

ജബൽപൂരിൽ ലെഫ്റ്റനന്റ് ആയി ജോലി നോക്കുന്ന ഭാര്യ ഗോപിചന്ദ്രയെ കണ്ട ശേഷം തിങ്കളാഴ്ച തിരികെ മടങ്ങുന്നതിനിടെയാണ് ജവാനെ കാണാതായത്. എല്ലാ ദിവസവും രാവിലെ മകൻ മെസേജ് അയക്കാറുണ്ട്. ഇത് കാണാതായതോടെയാണ് സംശയമുണർന്നത് എന്ന് നിർമ്മൽ ശിവരാജിന്റെ അമ്മ പറഞ്ഞു.

ജബൽപൂരിൽ നിന്ന് മൂന്ന് മണിക്കാണ് മകൻ യാത്ര തിരിച്ചത്. 8.30ന് ലക്ഷ്യസ്ഥാനത്ത് എത്തേണ്ടതായിരുന്നു. യാത്രാമധ്യേ ഫോണിൽ സംസാരിച്ചുകൊണ്ടിരിക്കവേ മുമ്പിൽ ഒരു ബ്ലോക്ക് കാണുന്നുണ്ടെന്നും അത് നോക്കിയിട്ട് തിരിച്ചുവിളിക്കാമെന്നും പറഞ്ഞാണ് മകൻ ഫോൺ കട്ട് ചെയ്തതെന്ന് അമ്മ പറയുന്നു. 9 മണിക്ക് വിളിച്ചപ്പോൾ അവന്റെ ഫോൺ സ്വിച്ച്ഡ് ഓഫായിരുന്നു. മറ്റൊരു സുഹൃത്തിനെ ഫോൺ വിളിച്ചപ്പോൾ അവൻ എത്തിയിട്ടില്ലെന്ന് പറഞ്ഞു. പിന്നീട് അവർ വിളിച്ചിട്ടേയില്ലെന്ന് അമ്മ പറയുന്നു. മകൻ പ്രളയത്തിൽ അകപ്പെട്ടതാണോ എന്നും കുടുബം സംശയിക്കുന്നു.