ഇന്ന്‌ മന്നം ജയന്തി ദിനാചരണം

ചങ്ങനാശേരി: 145 മതു മന്നം ജയന്തിദിനാചരണം ഇന്നു സംസ്‌ഥാന വ്യാപകമായി നടക്കും. കോവിഡ്‌ 19 ന്റെ പശ്‌ചാത്തലത്തില്‍ ഇന്നലെയും ഇന്നുമായി നടക്കേണ്ട സമ്മേളനങ്ങളും ആഘോഷങ്ങളും ഒഴിവാക്കിയിട്ടുണ്ട്‌. എല്ലാ താലൂക്കു യൂണിയനുകളിലും കരയോഗങ്ങളിലും രാവിലെ 11നു സമുദായാചാര്യന്റെ ചിത്രത്തിനു മുന്നില്‍ നിലവിളക്ക്‌ കൊളുത്തി പുഷ്‌പാര്‍ച്ചന നടത്തും. പെരുന്നയിലെ മന്നംസമാധിമണ്ഡപത്തില്‍ രാവിലെ 7.30 മുതല്‍ പുഷ്‌പാര്‍ച്ചന ആരംഭിച്ചു. കോവിഡ്‌ നിബന്ധനകള്‍ പാലിച്ചുകൊണ്ട്‌ സമുദായാംഗങ്ങള്‍ക്കും മറ്റ്‌ അഭ്യുദയകാംക്ഷികള്‍ക്കും പങ്കെടുക്കും.

വാക്കും പ്രവൃത്തിയും ഒന്നാക്കിയ മഹാനാണ് മന്നത്തു പദ്‌മനാഭൻ. നായർസമുദായത്തിന്റെ സർവസ്വവുമായ അദ്ദേഹം സ്വസമുദായത്തോടൊപ്പം സമൂഹത്തിന്റെയും രാജ്യത്തിന്റെയും നന്മയ്ക്കുവേണ്ടി തന്റെ ജീവിതാവസാനം വരെ നിസ്വാർഥമായി പ്രവർത്തിച്ച കർമയോഗിയാണ്. അദൃശ്യസാന്നിധ്യം കൊണ്ട് സർവീസ് സൊസൈറ്റിക്ക് മാർഗദീപമായി അദ്ദേഹം ഇന്നും നിലകൊള്ളുന്നു. അദ്ദേഹത്തിന്റെ ഓരോ ജന്മദിനവും കേരളത്തിലുടനീളമുള്ള കരയോഗാംഗങ്ങളെയും മറ്റ് അഭ്യുദയകാംക്ഷികളെയും പങ്കെടുപ്പിച്ചുകൊണ്ട് എല്ലാവർഷവും ജനുവരി 1, 2 തീയതികളിൽ നായർ സർവീസ് സൊസൈറ്റിയുടെ ആഭിമുഖ്യത്തിൽ ആഘോഷം കൊണ്ടാടിവരുകയായിരുന്നു. പെരുന്നയിലെ മന്നംസമാധിമണ്ഡപത്തിലും സംസ്ഥാനമൊട്ടുക്കുള്ള താലൂക്ക് യൂണിയനുകളിലും കരയോഗങ്ങളിലും എൻ.എസ്.എസ്. സ്ഥാപനങ്ങളിലും മന്നംജയന്തി ആചരണം നടത്തുകയാണ്.