മനുഷ്യത്വമുള്ള രാഷ്ട്രീയക്കാരൻ, എഴുത്തുകാരൻ, കവി; ബഹുമുഖപ്രതിഭയായ മുൻപ്രധാനമന്ത്രി എ ബി വാജ്പേയിയുടെ ജീവിതം അഭ്രപാളിയിലേക്ക്; പ്രശസ്ത നടൻ പങ്കജ് ത്രിപാഠി നായകനാകുന്ന ചിത്രം ഒരുങ്ങുന്നത് മലയാളി മാദ്ധ്യമപ്രവർത്തകന്റെ പുസ്തകം ആസ്പദമാക്കി

മുംബൈ: മുൻ പ്രധാനമന്ത്രി അടൽ ബിഹാരി വാജ്‌പേയിയുടെ ജീവിതകഥ പറയുന്ന ചലച്ചിത്രമാണ് ‘മേം രഹൂം യാ നാ രഹൂം യേ ദേശ് രഹ്ന ചാഹിയേ’ രാജ്യം കാത്തിരിക്കുന്ന സിനിമയിൽ പ്രശസ്ത നടൻ പങ്കജ്
ത്രിപാഠിയാണ് വാജ്‌പേയിയെ അവതരിപ്പിക്കുക. ചിത്രത്തിന് പിന്നിൽ ഒരു മലയാളി സാന്നിധ്യവുമുണ്ട്. മലയാളിയായ മാധ്യമപ്രവർത്തകൻ ഉല്ലേഖ് എൻ.പി.യുടെ ‘ദി അൺടോൾഡ് വാജ്പേയി: പൊളിറ്റീഷൻ ആൻഡ് പാരഡോക്സ്’ എന്ന പുസ്തകത്തെ അടിസ്ഥാനമാക്കിയാണ് ചിത്രം ഒരുങ്ങുന്നത്. രവി ജാദവാണ് ചിത്രത്തിന്റെ സംവിധായാകൻ. ഉത്കർഷ് നൈതാനിയുടേതാണ് തിരക്കഥ.

മനുഷ്യത്വമുള്ള ഒരു രാഷ്ട്രീയക്കാരനെ സ്‌ക്രീനിൽ അവതരിപ്പിക്കാൻ അവസരം ലഭിച്ചതിൽ അഭിമാനമുണ്ടെന്ന് പങ്കജ് ത്രിപാഠി പറഞ്ഞു. രാഷ്ട്രീയക്കാരൻ എന്നതിലുപരി മികച്ച എഴുത്തുകാരനും കവിയുമായിരുന്നു വാജ്‌പേയിയെന്നും അദ്ദേഹം പറഞ്ഞു. ചിത്രം 2023 ക്രിസ്മസിന് റിലീസ് ചെയ്യാനാണ് അണിയറ പ്രവർത്തകരുടെ തീരുമാനം. രാജ്യത്ത് ഏറെ ജനകീയനും പ്രിയങ്കനുമായ പ്രധാനമന്ത്രിയായിരുന്നു എ ബി വാജ്പേയീ. ദേശീയ തലത്തിൽ വ്യത്യസ്‌ത ആശയങ്ങളുള്ള നിരവധി കക്ഷികളെ അണിനിരത്തി മുന്നണി രാഷ്ട്രീയത്തിനു രൂപം നൽകിയത് വാജ്പേയീ ആയിരുന്നു. ലോക രാഷ്ട്രങ്ങൾ ഭാരതത്തെ ആണവരാഷ്ട്രമായി അംഗീകരിച്ച പൊഖ്‌റാൻ ആണവ പരീക്ഷണങ്ങൾ അടക്കം ശ്രദ്ധേയമായ നേട്ടങ്ങൾ വാജ്‌പേയിയുടെ കാലത്ത് രാജ്യം നേടിയിട്ടുണ്ട്. ദേശീയ ചലച്ചിത്ര പുരസ്ക്കാരം ഉൾപ്പെടെ നിരവധി പുരസ്‌ക്കാരങ്ങൾ നേടിയിട്ടുള്ള നടനാണ് പങ്കജ് ത്രിപാഠി. ഹിന്ദി, തെലുഗു, തമിഴ് ഉൾപ്പെടെ നിരവധി ഭാഷകളിൽ അറുപതിലധികം ചിത്രങ്ങളിൽ അദ്ദേഹം അഭിനയിച്ചിട്ടുണ്ട്