പശ്ചിമേഷ്യൻ യുദ്ധം: സഖ്യകക്ഷികളുടെ നാശനഷ്ടങ്ങൾ പരിഹരിക്കാൻ ഇറാന്റെ ആസ്തികൾ വകമാറ്റുമെന്ന് അമേരിക്ക

വാഷിങ്ടൺ : അമേരിക്കയും ഇറാനും തമ്മിലുള്ള വെടിനിർത്തൽ കരാർ കൂടുതൽ പ്രതിസന്ധിയിലായ സാഹചര്യത്തിൽ, പേർഷ്യൻ ഗൾഫ് മേഖലയിലെ സഖ്യകക്ഷികൾക്കുണ്ടായ നാശനഷ്ടങ്ങൾ പരിഹരിക്കാൻ ഇറാന്റെ ആസ്തികൾ ഉപയോഗപ്പെടുത്താൻ അമേരിക്ക ആലോചിക്കുന്നതായി റിപ്പോർട്ട്. കുവൈറ്റിലും ബഹ്റൈനിലും നടന്ന ആക്രമണങ്ങൾക്ക് മറുപടിയായി അമേരിക്ക ഇറാന്റെ സൈനിക കേന്ദ്രങ്ങൾ ലക്ഷ്യമിട്ടതോടെ മേഖലയിൽ യുദ്ധസമാനമായ സാഹചര്യമാണ് നിലനിൽക്കുന്നത്. മരവിപ്പിക്കപ്പെട്ട ആസ്തികൾ വിട്ടുനൽകണമെന്ന് ടെഹ്റാൻ ആവശ്യപ്പെടുമ്പോൾ, ഈ ഫണ്ട് പുനർനിർമ്മാണ പ്രവർത്തനങ്ങൾക്കായി വകമാറ്റാനാണ് അമേരിക്ക ലക്ഷ്യമിടുന്നത്. ഇതിനായി ഇറാന്റെ ആസ്തികൾ വകമാറ്റുന്ന കാര്യം അമേരിക്ക പരിഗണിക്കുന്നുണ്ടെന്ന് ഈ വിഷയവുമായി ബന്ധപ്പെട്ട വൃത്തങ്ങൾ അറിയിച്ചതായി റോയിട്ടേഴ്‌സ് റിപ്പോർട്ട് ചെയ്തു.

ആക്രമണം തുടരുന്ന സാഹചര്യത്തിൽ പുനർനിർമ്മാണത്തിനും അറ്റകുറ്റപ്പണികൾക്കും മാത്രമല്ല, സഖ്യകക്ഷികൾക്ക് ഇതിനകം സംഭവിച്ച നഷ്ടങ്ങൾക്ക് പരിഹാരം നൽകാനും ഈ ആസ്തികൾ ഉപയോഗിക്കാനാണ് യുഎസിന്റെ നീക്കം. ഏത് ഇറാനിയൻ ആസ്തികളാണ് പരിഗണനയിലുള്ളതെന്ന് വ്യക്തമല്ലെങ്കിലും, അമേരിക്ക നിലവിൽ മരവിപ്പിച്ചിട്ടുള്ള ആസ്തികളേക്കാൾ കൂടുതൽ ഈ നിർദ്ദേശത്തിൽ ഉൾപ്പെടുമെന്നാണ് സൂചന. ഗൾഫ് രാജ്യങ്ങളിൽ ഇറാന്റെ പേരിൽ ആരോപിക്കപ്പെടുന്ന മുൻകാല നാശനഷ്ടങ്ങളുടെ ചെലവ് വിലയിരുത്താനും, ആ ചെലവുകൾ വഹിക്കാൻ ഇറാന്റെ ആസ്തികൾ ഉപയോഗിക്കാമോ എന്ന് പരിശോധിക്കാനും യുഎസ് ട്രഷറി സെക്രട്ടറി സ്‌കോട്ട് ബെസെന്റ് ഉദ്യോഗസ്ഥരോട് ആവശ്യപ്പെട്ടതായി സ്രോതസ്സുകൾ സൂചിപ്പിക്കുന്നു. കുവൈറ്റിലും ബഹ്റൈനിലും നടന്ന ഇറാനിയൻ ആക്രമണങ്ങൾക്ക് തൊട്ടുപിന്നാലെ വന്ന ഈ നീക്കം നിലവിലെ ദുർബലമായ നയതന്ത്ര ശ്രമങ്ങളിൽ കൂടുതൽ പിരിമുറുക്കം ഉണ്ടാക്കിയേക്കാമെന്ന് നിരീക്ഷകർ വിലയിരുത്തുന്നു. നിലവിലുള്ള വെടിനിർത്തൽ കരാറിനിടയിലും അമേരിക്കയും ഇറാനും തമ്മിൽ സൈനിക ഏറ്റുമുട്ടലുകൾ നടക്കുന്ന സാഹചര്യത്തിലാണ് ആസ്തികൾ ഉപയോഗിക്കാനുള്ള നിർദ്ദേശം ഉയർന്നുവന്നിരിക്കുന്നത്.

ഹോർമുസ് കടലിടുക്കിലെ ഗോരുക്കിലെ ഇറാനിയൻ തീരദേശ റഡാർ കേന്ദ്രങ്ങളിലും ഖെഷ്ം ദ്വീപിലും യുഎസ് സൈന്യം ആക്രമണം നടത്തിയിരുന്നു. തന്ത്രപ്രധാനമായ ഈ ജലപാതയിലെ സമുദ്രഗതാഗതത്തിന് ഭീഷണിയാണെന്ന് കരുതപ്പെടുന്ന ഇറാനിയൻ ഡ്രോണുകളെ വെടിവെച്ചിട്ടതിന് പിന്നാലെയാണ് ഈ നടപടിയെന്ന് യുഎസ് സെൻട്രൽ കമാൻഡ് അറിയിച്ചു. കുവൈത്തിലെയും ബഹ്റൈനിലെയും യുഎസ് സൈനിക കേന്ദ്രങ്ങൾക്ക് നേരെ മിസൈലുകൾ വിക്ഷേപിച്ചുകൊണ്ടാണ് ഇറാൻ ഇതിനോട് പ്രതികരിച്ചത്. ജനവാസ മേഖലകളിലൂടെ ഏഴ് ബാലിസ്റ്റിക് മിസൈലുകൾ കടന്നുപോയെന്നും നാശനഷ്ടങ്ങൾ ഉണ്ടായെങ്കിലും ആളപായമില്ലെന്നും കുവൈത്ത് അധികൃതർ അറിയിച്ചു. ബഹ്റൈൻ അപായ സൈറണുകൾ മുഴക്കുകയും താമസക്കാരോട് സുരക്ഷിത സ്ഥാനങ്ങളിലേക്ക് മാറാൻ നിർദ്ദേശിക്കുകയും ചെയ്തു.

ഇരുരാജ്യങ്ങളിലെയും അമേരിക്കൻ താവളങ്ങളാണ് ലക്ഷ്യമിട്ടതെന്ന് ഇറാന്റെ റെവല്യൂഷണറി ഗാർഡ് പറഞ്ഞു. എന്നാൽ ആറ് മിസൈലുകൾ തടഞ്ഞതായും മറ്റൊന്ന് ലക്ഷ്യസ്ഥാനത്ത് എത്തിയില്ലെന്നും അമേരിക്കൻ സൈന്യം അറിയിച്ചു. ഏറ്റവും പുതിയ ഈ ഏറ്റുമുട്ടലുകൾ വെടിനിർത്തലിന്റെ ദുർബലത എടുത്തുകാണിക്കുകയും മേഖലയിൽ വലിയ തോതിലുള്ള സംഘർഷസാധ്യതയെക്കുറിച്ചുള്ള ആശങ്കകൾ വർധിപ്പിക്കുകയും ചെയ്തിട്ടുണ്ട്. സൈനിക പിരിമുറുക്കങ്ങൾ നിലനിൽക്കുമ്പോഴും മധ്യസ്ഥ ശ്രമങ്ങൾ സജീവമായി തുടരുകയാണ്. ഇതിന്റെ ഭാഗമായി പാകിസ്താൻ ആഭ്യന്തര മന്ത്രി മൊഹ്സിൻ നഖ്‌വി ടെഹ്റാനിലെത്തി. ഇറാന്റെ പരമോന്നത നേതാവ് മുജ്തബ ഖമേനിക്കായി പാകിസ്താൻ സൈനിക-രാഷ്ട്രീയ നേതൃത്വത്തിന്റെ പ്രത്യേക സന്ദേശം അദ്ദേഹം കൈമാറിയതായി ഇറാനിയൻ മാദ്ധ്യമങ്ങൾ റിപ്പോർട്ട് ചെയ്തു. ചർച്ചകളുടെ വേഗത കുറഞ്ഞുവെന്ന റിപ്പോർട്ടുകൾക്കിടയിലാണ് ഈ സന്ദർശനം.