തിരുവനന്തപുരം : നാലുപേര് കൂടിയപ്പോൾ ആളാകാൻ നോക്കിയ വി.ശിവൻകുട്ടിക്ക് തക്കമറുപടി നൽകി നടി നവ്യാ നായർ. യുവജനോത്സവത്തിൽ അതിഥികളായി എത്തുന്ന സെലിബ്രിറ്റികൾ വന്ന വഴി മറന്ന് വൻ പ്രതിഫലം കൈപ്പറ്റുന്നത് അവസാനിപ്പിക്കണമെന്നായിരുന്നു മന്ത്രി വി.ശിവൻകുട്ടിയുടെ പ്രസ്താവന. എന്നാൽ താൻ ഒരു രൂപ പോലും വാങ്ങാതെയാണ് വന്നിരിക്കുന്നതെന്ന് നടി നവ്യാ നായർ അതേവേദിയിൽ മന്ത്രിക്ക് മറുപടി നൽകി. കേരള സർവ്വകലാശാല കലോത്സവത്തിന്റെ ഉദ്ഘാടന ചടങ്ങിലാണ് മന്ത്രിയുടെ നിർദ്ദേശവും നടിയുടെ അതേ നാണയത്തിലുള്ള മറുപടിയും.
സംസ്ഥാന സ്കൂൾ കലോത്സവത്തിന്റെ ഉദ്ഘാടനത്തിന് തന്റെ ക്ഷണം സ്വീകരിച്ചെത്തിയ നടൻ മമ്മൂട്ടി പ്രതിഫലം വാങ്ങിയില്ലെന്നും സർവകലാശാല കലോത്സവം സാമ്പത്തിക ബുദ്ധിമുട്ട് നേരിടുന്നുണ്ടെന്നും ഉദ്ഘാടന പ്രസംഗത്തിൽ ശിവൻകുട്ടി പറഞ്ഞു. കൂടാതെ, സെലിബ്രിറ്റികൾ പ്രതിഫലം കണക്കാക്കാതെ ഇത്തരം പരിപാടികളെ സമീപിക്കണമെന്നും ശിവൻകുട്ടി ആവശ്യപ്പെട്ടു. എന്നാൽ, താൻ വന്ന വഴി മറക്കില്ലെന്നും കലോത്സവത്തിനെത്താൻ പ്രതിഫലം വാങ്ങിയിട്ടില്ലെന്നും നവ്യാ നായർ മറുപടി നൽകി. അതോടൊപ്പം സമ്മേളനത്തിനു വൈകാൻ കാരണം ഭാരവാഹികൾ വൈകിയതിനാലാണെന്നും പ്രസംഗത്തിൽ നവ്യാ നായർ അറിയിച്ചു.
