ഇത് പത്തരമാറ്റ് തങ്ക മണി !ബംഗ്ലാദേശ് പര്യടനത്തിനു ശേഷം കൊച്ചിയില്‍ വന്നിറങ്ങിയ മിന്നു മണിക്ക് വന്‍ വരവേല്‍പ്പ്

ബംഗ്ലാദേശ് പര്യടനത്തിലെ മികച്ച പ്രകടത്തിനു ശേഷം കൊച്ചിയിൽ വന്നിറങ്ങിയ വനിതാ ക്രിക്കറ്റ് താരം മിന്നു മണിക്ക് വന്‍ സ്വീകരണം. നെടുമ്പാശേരി വിമാനത്താവളത്തില്‍ എത്തിയ മിന്നുവിനെ വന്‍ ആവേശത്തോടെയാണ് ആരാധകർ സ്വീകരിച്ചത്. ദൈവത്തിനും ക്രിക്കറ്റ് അസോസിയേഷനും മിന്നു നന്ദി പറഞ്ഞു. ബംഗ്ലാദേശിനെതിരായ ടി-20 പരമ്പരയില്‍ അഞ്ച് വിക്കറ്റാണ് മിന്നു നേടിയത്. ഇതോടെ വരുന്ന മത്സരങ്ങളിലും മിന്നു ടീമിൽ സ്ഥിരം സാന്നിധ്യമായി മാറിയേക്കും.

“രണ്ട് ദിവസം കഴിഞ്ഞാണ് വയനാട്ടിലേക്ക് പോകുക. വളരെ സന്തോഷമുണ്ട്. ദൈവത്തിനോട് നന്ദി പറയുന്നു. എന്നെ നിങ്ങളുടെ മുന്നില്‍ ഇങ്ങനെ നില്‍ക്കാന്‍ പ്രാപ്തയാക്കിയ കേരള ക്രിക്കറ്റ് അസോസിയേഷന്‍, വയനാട് ക്രിക്കറ്റ് അസോ, കേരള ക്രിക്കറ്റ് അക്കാദമി തുടങ്ങിയവരോടും നന്ദി. ബൗളിംഗിലാണ് നല്ല അവസരം കിട്ടിയത്. ഓള്‍റൗണ്ടര്‍ എന്ന നിലയില്‍ കിട്ടിയ അവസരം നന്നായി പ്രയോജനപ്പെടുത്താനായി. പ്ലേയിംഗ് ഇലവനില്‍ ഉണ്ടെന്ന് തന്നെ അറിഞ്ഞത് ആദ്യമാച്ചിന്റെ ദിവസമാണെന്നും സഹതാരങ്ങളെല്ലാം നന്നായി പിന്തുണച്ചു” – മിന്നു മണി പറഞ്ഞു.