‘രാജ്യം കണ്ട ഏറ്റവും മികച്ച നേതാക്കളിൽ ഒരാൾ’; പ്രഥമ ലതാ ദീനനാഥ് മങ്കേഷ്‌കർ അവാർഡ് പ്രധാനമന്ത്രിയ്‌ക്ക്; മാതൃത്വത്തിന്റെയും സ്‌നേഹത്തിന്റെയും അനുഭൂതി നൽകാൻ സംഗീതത്തിന് കഴിയുമെന്ന് നരേന്ദ്ര മോദി

മുംബൈ: പ്രഥമ ലതാ ദീനനാഥ് മങ്കേഷ്‌കർ അവാർഡ് പ്രധാനമന്ത്രി നരേന്ദ്രമോദിയ്‌ക്ക്. രാജ്യത്തിനും സമൂഹത്തിനും വേണ്ടിയുള്ള നിസ്വാർത്ഥ സേവനമാണ് പ്രധാനമന്ത്രിയെ ഈ പുരസ്‌കാരത്തിന് അർഹനാക്കിയത്. ഇന്ന് മുംബൈയിൽ നടന്ന ചടങ്ങിൽ പ്രധാനമന്ത്രി പുരസ്‌കാരം ഏറ്റുവാങ്ങി. ‘മാതൃത്വത്തിന്റെയും സ്‌നേഹത്തിന്റെയും അനുഭൂതി നൽകാൻ സംഗീതത്തിന് കഴിയുമെന്ന് അവാർഡ് ദാന ചടങ്ങിനെ അഭിസംബോധന ചെയ്ത് കൊണ്ട് പ്രധാനമന്ത്രി പറഞ്ഞു. ‘സംഗീതത്തിന് ഓരോരുത്തരേയും ദേശസ്നേഹത്തിന്റെ കൊടുമുടിയിലെത്തിക്കാൻ സാധിക്കും. സംഗീതത്തിന്റെ ഈ ശക്തി ലതാ മങ്കേഷ്‌കറുടെ രൂപത്തിൽ അനുഭവിച്ചതിൽ എല്ലാവരും ഭാഗ്യവാന്മാരാണ്. സംഗീതം പോലൊരു വിഷയത്തെ കുറിച്ച് തനിക്ക് വലിയ അറിവുകളില്ല. എന്നാൽ സംഗീതം ഒരു പ്രത്യേക വികാരം തന്നെയാണ്’- പ്രധാനമന്ത്രി പറഞ്ഞു.

അതേസമയം 92-ാം വയസ്സിൽ അന്തരിച്ച ഇതിഹാസ ഗായിക ലതാ മങ്കേഷ്‌കറിന് സ്മരണാർത്ഥമാണ് ഈ അവാർഡ് നൽകുന്നത്. എല്ലാവർഷവും രാഷ്‌ട്രനിർമ്മാണത്തിനായുള്ള മാതൃകാപരമായ സംഭാവനകൾ നൽകുന്ന വ്യക്തിക്കാണ് നൽകുന്നത്. ഇക്കഴിഞ്ഞ ഫെബ്രുവരി ആറിനാണ് ലത മങ്കേഷ്‌കർ ലോകത്തോട് വിടപറയുന്നത്. ഇന്ത്യയെ ആഗോളതലത്തിൽ ഉന്നതിയിൽ എത്തിച്ച രാഷ്‌ട്ര തന്ത്രജ്ഞനാണ് പ്രധാനമന്ത്രിയെമന്ന് ലതാ ദീനനാഥ് മങ്കേഷ്‌കർ അവാർഡ് ട്രസ്റ്റ് പുറത്തിറക്കിയ പ്രസ്താവനയിൽ പറയുന്നു. കൂടാതെ ആയിരക്കണക്കിന് വർഷത്തെ മഹത്തായ ചരിത്രത്തിൽ നിന്നും നോക്കുമ്പോൾ രാജ്യം കണ്ട ഏറ്റവും മികച്ച നേതാക്കളിൽ ഒരാളാണ് പ്രധാനമന്ത്രി നരേന്ദ്രമോദി എന്നും അദ്ദേഹം രാജ്യത്തെ ആഗോളതലത്തിൽ ഉന്നതിയിൽ എത്തിച്ചുവെന്നും രാജ്യത്തിന്റെ എല്ലാ തലങ്ങളിലും സംഭവിച്ചുകൊണ്ടിരിക്കുന്ന പുരോഗതി പ്രധാനമന്ത്രിയുടെ നേതൃത്വത്തിലാണ് നടക്കുന്നതെന്നും ഈ പ്രവർത്തനങ്ങൾ എല്ലാവർക്കും പ്രചോദനമാണെന്നും പ്രസ്താവനയിൽ പറയുന്നു.