സംസ്ഥാനത്ത് വീണ്ടും സദാചാര ഗുണ്ടാ ആക്രമണം!വനിതാ സുഹൃത്തിന്റെ വീട്ടിലെത്തിയ യുവാവിന് ക്രൂരമർദനം

കോഴിക്കോട് : സംസ്ഥാനത്ത് സദാചാര ഗുണ്ടകളുടെ ആക്രമണത്തിൽ യുവാവ് കൊല്ലപ്പെട്ടതിന്റെ ഞെട്ടൽ മാറുന്നതിന് മുമ്പേ നാദാപുരത്ത് വനിതാ സുഹൃത്തിന്റെ വീട്ടിലെത്തിയ യുവാവിനെ സദാചാര ഗുണ്ടകൾ ക്രൂരമായി മർദിച്ചു. കൂത്തുപറമ്പ് ആയിക്കര മമ്പറം സ്വദേശി വിശാഖിനെയാണ് സദാചാര ഗുണ്ടാ സംഘം തല്ലിച്ചതച്ചത്. മർദനത്തിൽ കൈകാലുകൾ ഒടിയുകയും തലയിൽ ആഴത്തിൽ പരുക്കേൽക്കുകയും ചെയ്ത യുവാവിനെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

നാദാപുരം–പാറക്കടവ് റോഡിൽ തട്ടാറത്ത് പള്ളിക്കു സമീപം ഇന്ന് പുലർച്ചെ ഒരു മണിയോടെയായിരുന്നു ആക്രമണമുണ്ടായത്. യുവാവ് യുവതിയുടെ വീട്ടിലെത്തിയ വിവരം ആരോ ഫോണിൽ വിളിച്ചറിയിച്ചതിനെ തുടർന്നാണ് അക്രമികൾ എത്തിയതെന്നാണ് സംശയം. ഇരുമ്പ് ദണ്ഡുകളും ഹോളോബ്രിക്സ് കട്ടകളും ഉപയോഗിച്ചായിരുന്നു മർദനം. അക്രമികൾക്കെതിരെ വധശ്രമം ഉൾപ്പെടെയുള്ള വകുപ്പുകൾ ചേർത്താണ് കേസെടുത്തിരിക്കുന്നത്.