എലിവിഷം വച്ച് പല്ലു തേച്ച പതിനെട്ടുകാരിയ്ക്ക് ദാരുണാന്ത്യം

മുംബൈ: എലിവിഷം വച്ച് പല്ലു തേച്ച പതിനെട്ടുകാരിയ്ക്ക് ദാരുണാന്ത്യം. മഹാരാഷ്ട്രയിലാണ് സംഭവം. ധാരാവി സ്വദേശിയും 18കാരിയുമായ അഫ്‌സാനയാണ് മരിച്ചത്. രാവിലെ എഴുന്നേറ്റ് പല്ലുതേക്കാൻ പേസ്റ്റ് തിരഞ്ഞപ്പോൾ സമീപത്ത് വച്ചിരുന്ന എലിവിഷത്തിന്റെ ട്യൂബ് അബദ്ധത്തിൽ എടുക്കുകയും പല്ലുതേക്കുകയുമായിരുന്നു. ഇതിനെത്തുടർന്ന് പെൺകുട്ടി ചികിത്സയിലായിരുന്നു.

സെപ്റ്റംബർ 3ന് രാവിലെയായിരുന്നു എലിവിഷം ഉപയോഗിച്ച് അഫ്‌സാന പല്ലുതേച്ചത്. രുചിയിലും മണത്തിലും വ്യത്യാസം തോന്നിയ ഉടനെ വായ കഴുകിയെങ്കിലും അഫ്‌സാനയ്‌ക്ക് ‌അസ്വസ്ഥതകൾ ആരംഭിക്കാൻ തുടങ്ങി. കലശലായ വയറുവേദന അനുഭവപ്പെട്ടപ്പോൾ കയ്യിൽ കിട്ടിയ മരുന്നുകൾ കഴിച്ചു. വഴക്ക് കേൾക്കുമെന്ന് ഭയന്ന് മാതാപിതാക്കളിൽ നിന്നും വിവരം മറച്ചുവച്ചു.

എന്നാൽ അഫ്‌സാനയുടെ ആരോഗ്യനില വഷളാകുന്നത് ശ്രദ്ധയിൽപ്പെട്ട വീട്ടുകാർ കാര്യമറിയാതെ തന്നെ ആശുപത്രിയിൽ എത്തിച്ചു. വിവിധ സർക്കാർ-സ്വകാര്യ ആശുപത്രികളിൽ ചികിത്സ തേടിയെങ്കിലും അഫ്‌സാനയുടെ ആരോഗ്യനില പൂർവസ്ഥിതിയിലായില്ല. ഒടുവിൽ എലിവിഷം വായിലെത്തിയ വിവരം അഫ്‌സാന തുറന്നു പറഞ്ഞു. ഉടൻ തന്നെ ജെ.ജെ ആശുപത്രിയിൽ എത്തിച്ച് ചികിത്സ തേടിയെങ്കിലും അഫ്‌സാനയുടെ ജീവൻ രക്ഷിക്കാനായില്ല. അപകടം സംഭവിച്ച് 11-ാം ദിവസം പിന്നിടുമ്പോഴായിരുന്നു അന്ത്യം.