ജസ്പ്രീത് ബുംറയുടെ പകരക്കാരനെ പ്രഖ്യാപിച്ച് മുംബൈ ഇന്ത്യൻസ് ; മലയാളി താരം സന്ദീപ് വാര്യർ ടീമിലെത്തും

മുംബൈ : പരിക്കേറ്റതിനെ തുടർന്ന് ടീമിൽ നിന്ന് പുറത്തായ പേസ് ബൗളർ ജസ്പ്രീത് ബുംറയുടെ പകരക്കാരനെ മുംബൈ ഇന്ത്യൻസ് പ്രഖ്യാപിച്ചു. ജസ്പ്രീത് ബുംറയ്ക്ക് പകരമായി മലയാളി താരം സന്ദീപ് വാര്യറാണ് ടീമിൽ ഇടംനേടിയത്. റോയൽ ചലഞ്ചേഴ്‌സ് ബാംഗ്ലൂരിനെതിരായ മുംബൈ ഇന്ത്യൻസിന്റെ ആദ്യ മത്സരത്തിന് മുമ്പ് സന്ദീപ് വാര്യർ ടീമിനൊപ്പം ചേരും.

നേരത്തെ കൊൽക്കത്ത നൈറ്റ് റൈഡേഴ്സിനു വേണ്ടിയും റോയൽ ചലഞ്ചേഴ്സ് ബാംഗ്ലൂരിനു വേണ്ടിയും സന്ദീപ് വാര്യർ ഐപിൽ കളിച്ചിട്ടുണ്ട് . ആഭ്യന്തര ക്രിക്കറ്റിൽ 69 ടി20 മത്സരങ്ങൾ ഉൾപ്പെടെ 200-ലധികം മത്സരങ്ങൾ കളിച്ച സന്ദീപ് കരിയറിൽ ഇതുവരെ ആകെ 362 വിക്കറ്റുകൾ നേടിയിട്ടുണ്ട്. 2021ലാണ് അദ്ദേഹം ഇന്ത്യക്കായി അരങ്ങേറ്റം കുറിച്ചത്.