സിലിയ ഫ്ലോറസിനും കുരുക്ക് മുറുക്കി അമേരിക്ക : മയക്കുമരുന്ന് മാഫിയയുമായി ബന്ധമെന്നും വൻ തുക കൈക്കൂലി വാങ്ങിയെന്നും കുറ്റപത്രത്തിൽ

വെനസ്വേലൻ പ്രസിഡന്റ് നിക്കോളാസ് മഡുറോ അമേരിക്കൻ സേനയുടെ പിടിയിലായതിന് പിന്നാലെ അദ്ദേഹത്തിന്റെ ഭാര്യ സിലിയ ഫ്ലോറസിനെതിരെയും അതീവ ഗുരുതരമായ ആരോപണങ്ങളുമായി അമേരിക്കൻ പ്രോസിക്യൂട്ടർമാർ രംഗത്തെത്തി. മയക്കുമരുന്ന് കടത്തിന് ഒത്താശ ചെയ്യുന്നതിനായി വൻതുക കൈക്കൂലി വാങ്ങിയെന്നും രാജ്യത്തെ മയക്കുമരുന്ന് വിരുദ്ധ വിഭാഗത്തെ ദുരുപയോഗം ചെയ്തുവെന്നുമാണ് സിലിയക്കെതിരെ ചുമത്തിയിരിക്കുന്ന കുറ്റങ്ങൾ. വെനസ്വേലയിലെ നാഷണൽ ആന്റി ഡ്രഗ് ഓഫീസ് ഡയറക്ടറായിരുന്ന നെസ്റ്റർ റിവറോൾ ടോറസും മയക്കുമരുന്ന് മാഫിയാ തലവനും തമ്മിലുള്ള കൂടിക്കാഴ്ചയ്ക്ക് സൗകര്യമൊരുക്കാൻ 2007-ൽ സിലിയ ലക്ഷക്കണക്കിന് ഡോളർ കൈപ്പറ്റിയതായി കുറ്റപത്രത്തിൽ വ്യക്തമാക്കുന്നു. മയക്കുമരുന്ന് കയറ്റി വിട്ടിരുന്ന ഓരോ വിമാനങ്ങൾക്കും ലക്ഷക്കണക്കിന് ഡോളർ കൈക്കൂലി നിശ്ചയിച്ചിരുന്ന ഈ ഇടപാടിലെ വിഹിതം സിലിയയിലേക്കും എത്തിയെന്നാണ് അന്വേഷണ ഉദ്യോഗസ്ഥരുടെ കണ്ടെത്തൽ.

സിലിയ ഫ്ലോറസിന്റെ കുടുംബാംഗങ്ങൾക്കും മയക്കുമരുന്ന് ശൃംഖലയുമായി ബന്ധമുണ്ടെന്ന് തെളിയിക്കുന്ന വിവരങ്ങളും പ്രോസിക്യൂട്ടർമാർ പുറത്തുവിട്ടു. 2015-ൽ വെനസ്വേലൻ വിമാനത്താവളത്തിൽ നിന്ന് ടൺ കണക്കിന് കൊക്കെയ്ൻ വിദേശത്തേക്ക് കടത്താൻ സിലിയയുടെ അനന്തരവന്മാർ മുൻകൈയെടുക്കുന്ന ദൃശ്യങ്ങൾ അമേരിക്കൻ രഹസ്യാന്വേഷണ ഏജൻസികൾ ശേഖരിച്ചിരുന്നു. അമേരിക്കയുമായി തങ്ങൾ യുദ്ധത്തിലാണെന്നാണ് അന്ന് ഈ കൂടിക്കാഴ്ചയിൽ അവർ അവകാശപ്പെട്ടിരുന്നത്. ഈ കേസിൽ 18 വർഷം തടവിന് ശിക്ഷിക്കപ്പെട്ട ഇവരെ 2022-ൽ നടന്ന തടവുകാരുടെ കൈമാറ്റ ഉടമ്പടിയിലൂടെയാണ് വിട്ടയച്ചത്. ഇപ്പോൾ മഡുറോയ്‌ക്കൊപ്പം സിലിയയും മകനും മൂന്ന് സഹപ്രവർത്തകരും നാർക്കോ ടെററിസം ഉൾപ്പെടെയുള്ള വിവിധ കുറ്റകൃത്യങ്ങളിൽ നേരിട്ട് വിചാരണ നേരിടുകയാണ്.

സാധാരണ പശ്ചാത്തലത്തിൽ നിന്ന് അഭിഭാഷകയായി വളർന്ന സിലിയ ഫ്ലോറസ്, ഹ്യൂഗോ ഷാവേസിന്റെ കാലത്താണ് സോഷ്യലിസ്റ്റ് പ്രസ്ഥാനത്തിന്റെ മുൻനിരയിലേക്ക് വന്നത്. മഡുറോയുടെ രാഷ്ട്രീയ വളർച്ചയിൽ നിർണ്ണായക പങ്കുവഹിച്ച സിലിയ 2013-ന് ശേഷം ഔദ്യോഗിക പദവികൾ ഒഴിഞ്ഞെങ്കിലും ഭരണത്തിന്റെ നിയന്ത്രണങ്ങളിൽ വലിയ സ്വാധീനം ചെലുത്തിയിരുന്നു. തന്റെ രാഷ്ട്രീയ സ്വാധീനം ഉപയോഗിച്ച് ഭർത്താവിനും മകനുമൊപ്പം ചേർന്ന് മയക്കുമരുന്ന് വ്യാപാരത്തിന് വഴിയൊരുക്കിയെന്നാണ് യുഎസ് പ്രോസിക്യൂട്ടർമാർ ഇപ്പോൾ വാദിക്കുന്നത്. സിലിയയുടെയും മഡുറോയുടെയും അറസ്റ്റ് വെനസ്വേലയിലെ പഴയ ഭരണകൂടത്തിന്റെ പതനം പൂർണ്ണമാക്കുന്ന ഒന്നായാണ് അന്താരാഷ്ട്ര നിരീക്ഷകർ വിലയിരുത്തുന്നത്.